Xitayning sabiq alahide xadimi yüsüpjan emet: “Uchur bériwatqinimda tomurumdin qan sughurulghandek azablandim”

“El-jezire” téléwiziyesining ötken jüme künidiki bir mexsus xewiride ilgiri Uyghur rayonida xitay üchün uchur yetküzüp mexpiy xizmet qilghan yüsüpjan isimlik bir Uyghur yashning özini ashkarilighanliqi we xitayning Uyghurlargha séliwatqan zulumini pash qilghanliqi tilgha élindi. Bügün muxbirimiz nöwette türkiyede yashawatqan yüsüpjan emet bilen söhbet élip bardi. Söhbet dawamida yüsüpjan özining ilgiri dölet xewpsizlikige tehdit yetküzüsh jinayiti bilen eyiblinip, 2 yérim yilliq qamaq jazasigha höküm qilin'ghanliqi, jaza mudditini ötewatqan we jaza mudditini tügetkendin kéyinmu saqchilar teripidin mexpiy uchur yetküzüshke mejburlan'ghanliqi, axiri xitay zulumini dunyagha pash qilish üchün saqchilarning telipini qobul qilghanliqi we ularning ishenchige érishish arqiliq chet'elge chiqish pursitige érishkenlikini bayan qildi.

Özige xitay saqchilirining “Alahide xadim” dep nam bergenlikini tilgha alghan yüsüpjan xitaygha her qétim uchur yetküzgende “Tomuridin qan sughurulghandek azablan'ghanliqi” ni tilgha aldi.

Yuqiridiki awaz ulinishidin muxbirimizning yüsüpjan emet bilen ötküzgen söhbet xatirisini anglighaysiler.