Kommunizm idé'ologiyisi teshwiqatining qurbanliri (5)

“Milletler ittipaqi nemunichisi”-muhemmet qasimning hélihem namratliq halitide yashawatqanliqi melum

Uyghur aptonom rayonluq partkomning sékrétari jang chünshyenning biwasite riyasetchilikide 28-mart küni ürümchide échilghan “Milletler ittipaqliqi-tereqqiyat yili” seperwerlik yighini milletler ittipaqi témisini merkez qilghan teshwiqat pa'aliyetlirining bundin kéyin téximu yuqiri pellige chiqidighanliqidin ochuq bésharet bermekte.

Derweqe, xitay hökümiti “Milletler ittipaqliqi” namidiki türlük pa'aliyetlerni janlandurushqa küch serp qiliwatqan nechche on yilliq jeryanda köpligen yerlik “Ülge” lerni tiklep chiqqanliqi melum. Shundaqla xitay hökümitining bu xildiki siyasiy teshwiqatlirining yerlik Uyghurlar arisida belgilik netijilerge ige bolghanliqimu kishilerning diqqitige chüshmekte. Kucha nahiyisidiki muhemmet qasim boway bolsa yéqinqi yillarda herqaysi axbarat wasitiliri arqa-arqidin teshwiq qiliwatqan ene shu xildiki ülgilerning biri.

Muhemmet qasim bowayning özidin bu heqte tepsiliy uchur élish üchün köp tirishchanliqlar arqiliq axiri uning bilen alaqilishish hemde uning tepsiliy ehwalidin xewerdar bolush mumkin boldi.

Yerlik hökümet uning öyide mexsus qira'etxana tesis qilip, uni türlük siyasiy kitablar, gézit, zhurnallar bilen toldurup, özlirining “Milletler ittipaqliqi” heqqidiki teshwiqat pa'aliyetliri üchün paydilan'ghan. Shundaqla uning xitay teshwiqati üchün “Tügimes bayliq” ikenlikini teriplep, her qaysi jaylardin kelgen muxbirlarning ziyaret obyékti qilghan.

Muhemmet qasim bowayning bayanliridin melum bolushiche, u hazirmu nahayiti kembeghel yashawétiptu, shundaqla kündilik turmushida hélihem shu yerdiki köchmen xitaylarning maddiy yardimige qarashliq boluwétiptu. U hazirmu özining yashinip qalghanliqigha qarimay, öyidin birnechche kilométir yiraqliqtiki térilghu yéride déhqanchiliq qiliwétiptu. Méyip bolup qalghan balisigha hökümet yardem qilmighan bolghachqa öyde özi béqiwétiptu.

Muhemmet qasim bowayning éytip bérishiche, hazir köchmen xitaylar herqaysi mehellilergiche tarqilip olturaqlashqan bolup, uning biwasite yétekchilikide mehellisidiki Uyghurlar xitaylarning toy-tökünlirige we ölümige barghan, shundaqla ölgen xitaylarning ölük sanduqini bille kötürüp teng haza achqan.

Uning bilen bolghan söhbet jeryanida shu nerse melum boldiki, muhemmet qasim boway herqaysi yéza- mehellilerdiki rehbiriy hoquqni tutuwatqan xitay kadirlirini, shundaqla yézilarghiche orunlashqan xitay armiyisini kuchadiki “Yerlik xelqni bay qilish üchün kelgen” dep chüshinidiken. Emma ulargha aldirap yéqinlishish mumkin emeslikinimu bilidiken.

Uning éytip bérishiche, u nahiyidiki xitay armiyesidin “Hal sorash” üchün yéziliq hökümetning yardimi bilen bir qisim maddiy buyumlarni sétiwalghanda yerlik Uyghurlardin beziler uning bu ishigha narazi bolghan.