Qumulning qaradöwe, xotenning hanggiya yéziliri oqughuchilarni léksiyege teshkillimektiken

Muxbirimiz qutlan
2016.08.04
xinjiang-universiiteti-diniy-esebiylikning-mahayiti-we-ziyini-namliq-leksiye-2014.jpg “Shinjang ünwérsititi” da uyushturulghan “Diniy esebiylikning mahiyiti we ziyini” namliq léksiyedin bir körünüsh. 2014-Yili mart, ürümchi.
RFA/Qutlan

Uyghur élidiki ijtima'iy taratqularning uchurlirigha qarighanda, bu yilliq yazliq tetil üchün yurtigha qaytqan aliy mektep oqughuchiliri yerlik da'irilerning pilanlishi bilen “Siyasiy teshwiqat” léksiyesi anglashqa uyushturulmaqtiken.

Bügün qumul shehiridin ma'arip sépide xizmet qilidighan bir xadimning radiyomizgha bildürüshiche, 27 - iyul küni qaradöwe bazirida yazliq tetil mezgilide yurtigha qaytqan aliy mektep oqughuchilirigha bir meydan léksiye uyushturulghan.

Igilinishiche, qaradöwe bazirining bashliqi yüsüp is'haq bilen qumul sheherlik ma'arip idarisining mutexessisliri 150 tin artuq qaradöwilik istudéntlargha mexsus léksiye sözligen.

Ularning léksiyeside qaradöwining nöwettiki siyasiy we iqtisadiy ehwali, aliy mektep oqughuchilirining öz yurti üchün qilishqa tégishlik xizmetliri, hökümetning din, milliy mesile heqqidiki qanun - belgilime we siyasetliri shundaqla “Üch xil küch” ke qandaq taqabil turush heqqidiki konkrét chariler alahide tekitlen'gen iken.

“Shinjang uniwérsitéti” da uyushturulghan “Diniy esebiylikning mahiyiti we ziyini” namliq léksiyeni anglawatqan Uyghur oqughuchilar. 2014-Yili mart, ürümchi.
“Shinjang uniwérsitéti” da uyushturulghan “Diniy esebiylikning mahiyiti we ziyini” namliq léksiyeni anglawatqan Uyghur oqughuchilar. 2014-Yili mart, ürümchi.
RFA/Qutlan

Mezkur xadimning bildürüshiche, yerlik da'irilerning yéqinqi birqanche yilliq teshwiqati we tinimsiz xizmet ishlishi dawamida nöwette qaradöwe bazarliq mektepte béshigha yaghliq artidighan qiz oqughuchilar asasen qalmighan iken.

Melumki, qaradöwe baziri qumul shehirining texminen 85 kilométir gherbige jaylashqan bolup, bu yer qumuldiki dangliq “Chilan bazisi” hésablinidiken. Bu bazardiki 10 nechche ming ahalining 90 pirsenttin köprekini yerlik Uyghurlar teshkil qilghan bolup, din we milliy mesilide qumuldiki eng sezgür rayonlarning biri iken.

Xoten wilayitining ma'arip saheside xizmet qilidighan bir mes'ul xadimning radiyomizgha bildürüshiche, lop nahiyesining hanggiya yézisi yazliq tetil mezgilide oqughuchilarni iz qoghlap nazaret qilish jehette bashqa yézilargha “Ülge” yaratmaqtiken.

Mezkur xadim lop nahiyelik ma'arip idarisidiki barliq xizmetchi xadimlarning herqaysi yézilardiki mekteplerge ewetilgenliki we ma'arip idarisi bilen mes'uliyet toxtami tüzgenlikini ashkara qildi.

Igilinishiche, hanggiya yézisi tewesidiki mekteplerde yazliq tetil mezgilide oqughuchilarni iz qoghlap nazaret qilish, qatlammu - qatlam tekshürüp turush, her jüme küni pütün oqutquchi we oqughuchilar mektepke yighiwélinip siyasiy léksiye anglash ishliri orunlashturulghaniken.

Siyasiy léksiye sözleshtin ibaret bu teshwiqat pa'aliyitining ottura, bashlan'ghuch mekteplerdin sirt yene, Uyghur élidiki aliy mekteplerdimu keng qanat yéyishi diqqet qozghimaqta.

Ürümchidiki melum aliy mektepning teshwiqat bölümide uzun yil xizmet qilghan, emma nam - sheripini ashkarilashni xalimaydighan bir xanimning radiyomizgha bildürüshiche, aliy mektep oqughuchilirigha siyasiy léksiye sözlesh teshwiqat pa'aliyiti 2004 - yilidin buyan resmiy yolgha qoyulghan iken.

2009 - Yilidiki “5 - Iyul weqesi” din kéyin, aliy mekteplerdiki siyasiy léksiyelerning tigh üchi biwasite atalmish “Üch xil” küchke qaritilip, léksiye sözligüchiler kölemleshken hemde uning qaplash da'irisi Uyghur aptonom rayonidiki 15 aliy mektepke kéngeygen iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.