"Jaza lagérliri" mesilisi londonda ötküzülgen "Uyghur kéchiliki" ning asasliq témisi boldi

Ixtiyariy muxbirimiz erkin tarim
2018-11-19
Élxet
Pikir
Share
Print
London sheher merkizidiki "Yunus emre medeniyet merkizi" de ötküzülgen "London Uyghur kéchiliki" de london Uyghur jem'iyitining re'isi nizamettin semedof söz qilmaqta. 2018-Yili 16-noyabir.
London sheher merkizidiki "Yunus emre medeniyet merkizi" de ötküzülgen "London Uyghur kéchiliki" de london Uyghur jem'iyitining re'isi nizamettin semedof söz qilmaqta. 2018-Yili 16-noyabir.
RFA/Erkin Tarim

Uyghur mesilisining xelq'aralishishigha egiship, dunyaning muhim siyasiy merkezliridin biri bolghan en'gliye paytexti londonda Uyghurlar heqqidiki pa'aliyetler küchiyishke bashlandi. 16-Noyabir küni london sheher merkizidiki "Yunus emre medeniyet merkizi" de "London Uyghur kéchiliki" ötküzüldi.

Xelq'ara qelemkeshler Uyghur merkizi bilen london Uyghur jem'iyiti birlikte uyushturghan pa'aliyetke londondiki ammiwi teshkilatlarning mes'ulliri, yazghuchilar, zhurnalistlar, oqutquchi-oqughuchilar we londondiki Uyghurlardin bolup köp sanda kishi ishtirak qildi.

"London Uyghur kéchiliki" de Uyghur diyaridin yéngi qaytip kelgen in'gliz zhurnalistlarmu qatniship, Uyghur diyarida körgenlirini anglatqan bolup, Uyghur diyaridiki jaza lagérliri mesilisi mezkur kéchilikning asasiy témisigha aylan'ghan.

Xelq'ara qelemkeshler Uyghur merkizi bilen Uyghur jem'iyiti uyushturghan "London Uyghur kéchiliki" de london uniwérsitétining oqutquchisi doktor rachél xarris xanim, washin'gtondiki Uyghur kishilik hoquq qurulushining tetqiqatchisi zubeyre shemsidin xanim, özbék zhurnalist we yazghuchi xemit isma'ilof, londondiki Uyghur pa'aliyetchi rahime mexmut xanimlar doklat bergen.

Mezkur pa'aliyetke qatnashqan eziz eysa ependi radiyomiz ziyaritini qobul qilip, melumat berdi.

Uning éytishiche, mezkur pa'aliyet türmidiki we jaza lagérliridiki Uyghur ziyaliyliri we shundaqla jaza lagérlirida yétiwatqan bigunah Uyghurlargha atap ötküzülgen bolup, yighinning échilish murasimida bu yil iyul éyida türmige tashlan'ghan Uyghur sha'ire chimen'gül sawutning "Jan qozam, sen yighlima, pütün dunya sen üchün yighlaydu" dégen shé'iri oqup ötülgen.

Uyghur pa'aliyetchi rahime mexmut xanim hazir awstraliyede yashawatqan söyün'gül janishéf xanimning "Köz yéshida nemlen'gen zémin" namliq kitabni in'gliz tiligha terjime qilghan bolup, u yighinda bu kitabni Uyghur diyarining bügünki weziyitige baghlap turup chüshenche bergen. Axirida yighin ehlige Uyghurche naxsha orundap bergen.

London Uyghur jem'iyitining idare hey'et ezasi kérem zahir ependi ziyaritimizni qobul qilip, londonning dunya siyasiy merkezliridin biri hésablinidighanliqini, shunga londonda Uyghurlar toghriliq köp xil pa'aliyetlerni élip bérishni pilanlawatqanliqini, bundaq pa'aliyetlerning bundin kéyin téximu küchiyidighanliqini tekitlep ötti.

16-Noyabir küni ötküzülgen "London Uyghur kéchiliki" mol mezmun'gha ige bir pa'aliyet bolghan bolup, eziz eysa yazghan shu namliq hékayige asasen ishlen'gen "Jawabsiz qalghan téléfon" namliq höjjetlik filimmu körsitilgen. Mezkur pa'aliyet BBC ning özbékche bölümi teripidin xewer qilin'ghan.

Toluq bet