Kériyede doxturxanidin qachqan ata: sewebinglar bilen qutulup qalduq, emma endishimiz yene bar

Muxbirimiz shöhret hoshur
2014-01-07
Élxet
Pikir
Share
Print
Balilirini oynitiwatqan Uyghur ayal. 2012-Yili 1-iyul, qeshqer.
Balilirini oynitiwatqan Uyghur ayal. 2012-Yili 1-iyul, qeshqer.
PHOTONONSTOP

Kériyening arish yézisida tughulush aldidiki 6 neper bowaqning ana qarnida öltürülgenliki heqqide uchurlar ijtima'iy taratqularda jem'iyetke ashkarilan'ghandin kéyin, mezkur yézigha téléfon qilip ehwal igiligen iduq. Yézining mes'ul rehberliri özliri sadir qilghan hamile qetle qilish weqesini iqrar qilghan؛ weqening dunyagha ashkarilan'ghanliqidin ümidlen'gen metqurban nuri hamilidar ayalini élip doxturxanidin qachqan idi. Bügün yeni aridin bir hepte ötkende muxbirimiz metqurban'gha qayta téléfon qilip, ularning nöwettiki ehwalini soridi. Metqurban nuri doxturxanidin qachqandin kéyin da'irilerning özlirini izdimigenlikini, netijide hamilining hazirghiche aman turuwatqanliqini éytip muxbirimizgha minnetdarliq bildürdi. Emma u yene, mehellide tarqalghan bezi mish-mish gepler sewebidin hamilining teqdiridin yenila endishe qiliwatqanliqini bayan qildi.

Biz bügün aldi bilen 8 ayliq balisi chüshürüwétilgen mettursun qawulni ziyaret qilduq. Mettursun ötkende ziyaritimizni qobul qilghandin kéyin özining héchqandaq bir awarichilikke uchrimighanliqini bayan qilish bilen birlikte, shuningdin kéyin bala chüshürüsh weqesining özi tewe kentte yüz bermigenlikini, hetta doxturxanigha apirilghan metqurban nurining ayalining opératsiyidin qutulup qalghanliqini éytti.

So'al: undaqta hazirghiche kent yaki yéza rehberliri silerning balanglarni chüshürginimiz xata boptu dégen gepni qilmidimu?
Jawab: yaq bolmidi. Héchkim bu heqte chüshendürüsh bermidi. Doxturxanigha aparghuche mökün'gen yérimizdin izdep tépip qarangghuda mejburiy qol qoydurghan shu kadirlarning héchqaysi yoq, chatiqi bolmidi.
Biz ötken hepte doxturxanidin qachqan metqurban nurini ziyaret qilduq:

So'al: qandaq ehwalinglar hazir?
Jawab: yaxshi, öyde olturduq.

So'al: ayalingizni qayta doxturgha apirimiz dep kelmidimu?
Jawab: kelmidi, shu kündin kéyin méni izdigen bolmidi؛ shunga öyge qaytip kélip dem éliwatimiz.

So'al: ayalingizning keypiyati qandaq? qorqup ketken ehwal barmu?
Jawab: yaq undaq ehwalmu yoq. Iltipatinglar bilen aman qalduq, öydin chiqmay olturuptimiz.

So'al: doxturxanidin qéchip ketkininglar xata boldi dep kayighuchilar bolmidimu, bashliqlardin?
Jawab: yaq bolmidi. Shu siz téléfon qilghan küni, men doxturxanidin qéchip chiqip ketkendin kéyinla sun shuji(yéziliq partkom sékrétari) téléfon qiptiken, kent bashliqigha, pulni qayturuwélinglar dep...

So'al: bu néme pul?
Jawab: biz doxturxanigha barghan küni 2400 som töligen doxturxanigha, shu pulni doxturxanidin qayturuwaptu, biz bala aman qalghandikin meyli déduq.

So'al: doxturxanining bala chüshürgen pulini siz özingiz tölidingizmu? bashqilarmu shundaqmu?
Jawab: sekkiz ayliq balini chüshürüshke 3500 som töleptu, ata-anisi shundaq deydu؛ bashqiliri 900 som, 1000 somdin ötküzduq deydu.

So'al: emise mumkin bolsa shu a'ililerge tölitiwatqan, bolmighanda kent özi töligen yaki toluqlighan gepken-de?
Jawab: shundaq, shundaq oxshaydu.

So'al: yene endishenglar barmu?
Jawab: tünügün bir mish-mish gep chiqti. "Silining balini chüshürüwetmise bolmaydiken" dep, "Kelsun balini alimen dégüche méni atsun" dep olturdum.

So'al: bu gep qeyerdin chiqqan gep?
Jawab: bügün nahiyede bir pilanliq tughut yighini échiliptimish, pütün ayal mudirlar qatnishiptu, bundin kéyin 5 ayliqtin chong bowaqlarni chüshürmeymiz, 5 ayliqtin töwenlerni chüshürüwérimiz deptumish.

So'al: bu, kocha paringimu, rehberlerdin anglidingizmu?
Jawab: mehellidiki gep.

So'al: siler doxturxanidin chiqip ketkendin kéyin silerdin bashqilarnimu doxturxanigha aparghan, chüshürgen ehwal boldimu, anglidinglimu?
Jawab: bolmidi؛ undaq gepni anglimiduq.

Yuqirida, ötken hepte kériyede hamilini ölümdin qutuldurush üchün doxturxanidin qachqan a'ilining nöwettiki ehwali heqqide melumat berduq.

Toluq bet