Türkiyediki Uyghur teshkilatliri xitayning "Qoshmaq tughqandarchiliq siyasiti" ni eyiblidi

Ixtiyariy muxbirimiz arslan
2018-01-05
Élxet
Pikir
Share
Print
Istanbulda échilghan qérindashlar uchrishishi we söhbet yighinidin bir körünüsh. 2018-Yili 5-yanwar. Istanbul, türkiye.
Istanbulda échilghan qérindashlar uchrishishi we söhbet yighinidin bir körünüsh. 2018-Yili 5-yanwar. Istanbul, türkiye.
RFA/Arslan

Bügün istanbuldiki Uyghur jama'iti bir jaygha jem bolup, xitay hökümitining Uyghur diyarida bazargha séliwatqan atalmish "Qoshmaq tughqandarchiliq siyasiti" ni qattiq eyiblidi. Yighilishta xitayning mezkur assimilyatsiye siyasitige qarshi jama'et pikri peyda qilish we türkiyening munasiwetlik organlirigha telepname sunush qarar qilindi.

Sherqiy türkistan ma'arip jem'iyitining uyushturushi bilen her ayda bir qétim ötküzülüp kéliwatqan qérindashlar uchrishishi we söhbet yighinining bu ayliqi 5-yanwar küni jem'iyetning istanbuldiki merkizide ötküzüldi. Yighin'gha jem'iyetning bash katipi ablet hajim riyasetchilik qildi. Yighin ömer qarimining qur'an kerim tilawet qilish bilen bashlandi.

Yighinda jem'iyetning re'isi hidayetullah oghuzxan söz qilip, Uyghur xelqining nöwette duch kéliwatqan qiyin mesililiri toghrisida toxtaldi. Hidayetullah oghuzxan sözide xitay da'irilirining Uyghur diyarida yürgüzüwatqan atalmish "Qoshmaq tughqanchiliq siyasiti" ni tenqid qildi we bu qilmishlargha qarshi türkiye tashqi we ichki ishlar ministirliqini heriketke keltürüsh üchün pütün türkiyediki Uyghur muhajirlarni Uyghur diyaridiki a'ilisining türmige qamalghan sergüzeshtlirini yézip türkiye bash ministirliqigha, tashqi we ichki ishlar ministirliqigha erz sunush, yardem telep qilip xet yézishqa chaqiriq qildi.

Yighinda yene sherqiy türkistan ölimalar birlikining re'isi doktor atawullah shehyari söz qilip, xitayning atalmish "Qoshmaq tughqanchiliq siyasiti" ni Uyghurlarning qobul qilmaydighanliqini, Uyghur musulmanlarning ayalliri bolghan öyge yat erlerning, bolupmu gheyriy musulmanlarning kirishining qet'iy cheklen'genlikini ipadilidi we bu zulumdin qutulush üchün Uyghurlarning birlishish kéreklikini tekitlidi.

Hidayetullah oghuzxan sözide yene kochilargha chiqip namayish qilish kérekmu, teshwiqat qilish kérekmu yaki bashqa néme ish qilish kérekliki toghrisida toxtaldi. U, sherqiy türkistandiki zulumni anglitish üchün munasiwetlik teshkilat we jem'iyetler bilen meslihetliship, ortaq bir pilan bilen ish qilish kéreklikini tekitlidi. Hidayetullah oghuzxan sözide yene nöwette Uyghur xelqining béshigha kéliwatqan azab külpetlerni türkiye xelqige anglitish arqiliq jama'et pikir peyda qilish bu arqiliq enqerege tesir körsitish kéreklikini tekitlidi. 

Yighin Uyghurlarning bésimdin qutulushi üchün du'a oquldi.

Toluq bet