Баш вәзир абениң иптар зияпити японийәдики мусулманларни һаяҗанға салди

Ихтиярий мухбиримиз һаҗи қутлуқ қадири
2013.08.02
abe-and-aduraxman-ramazan-yaponiye-yaponiye-ramazan.JPG Сумо челишиш маһири мисирлиқ абдурахман еһмәд шаалан вә японийә баш вәзири шинзо абе қол елишип турған көрүнүши (“Japan Times” гезитидин). 2013-Йили 31-июл, японийә.
RFA/Qutluq

Японийәдә мусулманларниң саниниң көпийиши вә японийә һөкүмитиниң ислам әллири билән болған дипломатийә алақисиниң күнидин-күнгә ешишиға әгишип, японийә һөкүмити ислам диниға вә мусулман әллиригә болған дипломатийә сияситидә көплигән өзгиришләрни һасил қилмақта.

Японийә һөкүмитиниң пәләстингә ярдәм бериш хәлқара йиғини ечиши, уйғур миллий һәрикитиниң рәһбири рабийә қадир ханимға уйғур мәсилисини аңлитиш үчүн сәһнә һазирлап беришидин ибарәт мусулманлар үчүн елип берилған бир қатар паалийәтләр японийәдә яшаватқан мусулманларни шадландурған болса, бу йил мусулманларниң улуғ рамизан ейида японийә баш вәзири шизо абениң иптар зияпити өткүзүши японийәдики мусулманларни һаяҗанға салди.

Японийәдики нопузлуқ мәтбуатларниң ашкарилишичә, 7-айниң 31-күни японийә баш вәзири шизо абе җанаблири токйодики баш вәзир сарийида 44 мусулман дөлитиниң дипломатлириға вә ундин башқа японийәдә хизмәт қиливатқан һәрсаһәдики мусулманларға рамизанлиқ иптар зияпити бәргән.

Баш вәзир абениң бу қетимқи иптар зияпитидин һаяҗанланған чәтәллик оқуғучиларни ишқа тонуштуруш ширкитиниң директори түркийәлик бора бингөл әпәнди зияритимизни қобул қилип мундақ деди:
-японийә ислам дөлити әмәс, бу бир буддизм дөлити. Әмма улар бизни унтумиди. Рамизан ейини хатирилиди. Бу наһайити бир яхши өзгириш.

Баш вәзир абе иптар зияпитигә мусулманларниң диний өрп-адәтлири асас қилинған япончә йемәкликләрдин суши, тоху гөши қатарлиқ таамларни һазирлиған. Мәзкур иптар зияпитигә иштирак қилған мусулманларму өзлири яхши көридиған йемәклик вә ичимликләрни биргә елип кәлгән.

Мәзкур иптар зияпитидин мәмнунлуқини билдүргән японийәлик тәтқиқатчи ямагучи бу һәқтә тохтилип мундақ деди:
-Шинзо абениң иптар зияпити бериши бу наһайити әһмийәтлик бир иш. Биз мусулман дуняси билән көпрәк пикирләшкәндә, сөһбәтләшкәндә андин өз-ара чүшиниш һасил қилалаймиз. Мусулманлар узақ тарих, бүйүк мәдәнийәткә игә, шуңа японларниң ислам динини вә мусулманларни чүшиниши үчүн бундақ паалийәтләр көпрәк өткүзүлүши керәк дәп ойлаймән.

Баш вәзир абе иптар зияпитидә өзиниң йеқиндин буян оттура шәрқ вә җәнубий асиядики мусулман әллиригә елип барған бир қанчә қетимлиқ зияритидин кейинки тәсирати һәққидә қисқичә тохталған.

Шизо абе сөзидә япончә әнәниви челиш түрлиридин бири болған сумо челишиш маһири мисирлиқ абдурахман еһмәд шааланни тонуштуруп, абдурахман болса тунҗи африқилиқ сумо челишиш маһири, у шундақла мусулман дуняси билән японийә арисидики көврүк, абдурахман рамизан ейида роза тутуп турупму нагоя шәһиридә өткүзүлгән мусабиқидә яхши нәтиҗигә еришти, дәп уни махтиған вә униң билән бирликтә хатирә сүрәткә чүшкән.

Баш вәзир абениң иптар зияпитидә ислам әллириниң дипломатлириға вакалитән сөз қилған алҗирийә әлчиханисиниң баш әлчиси сәид ели сөзидә ислам дуняси билән японийәниң охшашлиқ тәрәплириниң көплүкини,шуңа мусулман дөләтлири билән японийәниң илим-пән,маарип,иқтисад вә башқа җәһәтләрдә өз-ара һәмкарлиқини күчәйтиш керәкликини тәкитлигән.

Зияритимизни қобул қилған теббий пәнләр доктори пакистанлиқ доктор авзал әпәнди бу қетимқи ифтар зияпити һәққидә тохтилип мундақ деди:
-Бу наһайити яхши иш.Мундақчә ейтқанда мәдәнийәт алмаштуруш паалийити дәп ейтишқа болиду.Бу иккила тәрәпниң бир-бирини өз-ара чүшинишигә пайдилиқ.Һазирғичә японийәдә бундақ паалийәтләр көрүлмигән.

Ахирда зияритимизни қобул қилған дуня уйғур қурултийиниң муавин рәиси илһам мәхмут бу қетимқи шизо абениң ифтар зияпити тоғрисида тохтилип өтти.

Аваз улинишидин тәпсилатини аңлаң.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.