Shiwétsiyediki "Uyghur ma'arip uyushmisi" yilliq xizmet pilanini otturigha qoydi

Ixtiyariy muxbirimiz éhsan
2016-01-12
Share
uygur-marrip-uyushmisi-shiwetsiye.jpg Uyghur ma'arip uyushmisi idare hey'etliri yighinda. 2016-Yili 9-yanwar, sitokholm.
RFA/Éhsan

Shiwétsiyede pa'aliyet qiliwatqan Uyghur ma'arip uyushmisi 2015-yilliq pa'aliyetlirini xulasilesh bilen birge, 2016-yili élip barmaqchi bolghan yilliq xizmet pilanlirini otturigha qoydi we idare hey'et ezalirining mes'ul xizmetlirini békitti.

Mezkur jem'iyetning yilliq yighini 2016 yili 9 yanwar shenbe küni kechte jem'iyet merkizide élip bérildi. Yighin'gha da'imiy idare hey'et ezaliri qatnashti.

Yighinda Uyghur ma'arip uyushmisining yéqinda élip barghan saylimida köp sanliq awaz bilen 5-nöwetlik re'islikke saylan'ghan abdullah kökyar ependi 2016 yili élip barmaqchi bolghan yilliq pilan layihilirini otturigha qoydi.

Uyghur ma'arip uyushmisi 2006-yili shiwétsiyede yashawatqan Uyghurlarning diniy étiqadi, milliy ma'aripi, til-yéziqi, we bashqa medeniyetlirini ewladmu-ewlad qoghdap dawamlashturushni merkez qilghan, diniy ma'arip bilen milliy ma'aripqa teng ehmiyet bérish bilen birge, yéngi uslub bilen xizmet ishleshni özining mizani qilghan, idiye jehette saghlam we mötidil islam eqidisini asas qilghan, siyasiy ishlarda démokratiye-xelqchilliqni teshebbus qilghan, öz aldigha terbiyiwi teshkilat bolup, bu teshkilat xelq'araliq nizamnamilerge uyghun halda 2006-yili bir guruppa Uyghur ziyaliylarning teshkillinishide shiwétsiyening merkizi sitokholmda qurulghan.

Shiwétsiye Uyghur ma'arip uyushmisi shiwétsiyediki alaqidar hökümet orunliri teripidin tizimgha élin'ghan we emeliy xizmetliri arqiliq, shiwétsiye ichi we sirtidiki her derijilik hökümet organliri we xelq ammisining étirap qilishigha érishken qanunluq teshkilat.

Bu teshkilat 2010-yili shiwétsiye parlaméntidiki 8 partiye birliship qurghan "Shwétsiye-Uyghur dostluq guruppisi"ning qurulushida asasliq rol oynighan.

2009-Yildin buyan shiwétsiyede xitay da'irilirige qarshi élip bérilidighan namayishlarni izchil teshkillep kelmekte.

2012-Yili dunya Uyghur qurultiyi bilen zich hemkarliship shiwétsiyede panahlan'ghan Uyghurlarning bir tutash halette panahliqi qobul qilinishida muhim xizmetlerni ishligen.

Uyghur ma'arip uyushmisigha qarashliq teklimakan islam jem'iyiti we mexmut qeshqiri ana-til mektipimu shiwétsiyening alaqidar tarmaqlirida tizimgha élin'ghan bolup, shiwétsiyediki Uyghur jama'iti üchün diniy we ana tilini saqlap qélish jehetlerde oqu-oqutush xizmitini dawamlashturup kelmekte.

Biz Uyghur ma'arip uyushmisining élip bériwatqan xizmetliri heqqide köz qarishini élish üchün shiwétsiyede yashawatqan ziyaliy bextinsa xanimni ziyaret qilduq.

Bextinsa xanim Uyghur ma'arip uyushmisining 10yil jeryanida, shiwétsiyediki Uyghur jama'etliri üchün qilghan xizmetlirini xulasilep, Uyghur ma'arip uyushmisining Uyghur tili we diniy,siyasiy,ijtima'iy jehetlerde izchil xizmetlerni élip barghanliqini mu'eyyenleshtürdi.

Shiwétsiyede yashawatqan chonglardin murat axtam ependi Uyghur ma'arip uyushmisining qiliwatqan xizmetlirige yuqiri baha béridighanliqini, bolupmu Uyghurlarning ikki héyt namizini bir yerde jem bolup oquwatqanliqi hemde Uyghurche xutibini anglap kéliwatqanliqidin memnun ikenlikini bildürdi.

Axirida ziyaritimizni qobul qilghan Uyghur ma'arip uyushmisining re'isi abdulla kökyar ependi 2016-yilliq asasliq türde élip baridighan xizmetliri heqqide toxtilip:
"Birinchidin, teshkil izchil türde dawamlashturup kéliwatqan ösmür balilarning ana til wediniy sawat oqutushini téximu mukemmelleshtürüsh. Ikkinchidin, shiwétsiyediki ammiwi teshkilatlar we shiwétsiye hökümitining alaqidar idariliri bilen alaqini kücheytish. Üchinchidin, shiwétsiyede Uyghurlar tewelikide bolghan meschit berpa qilish xizmitini qollap quwetlesh xizmetlirini élip barimiz" dédi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet