Shiwétsiyediki islam yighinida sherqiy türkistan mesilisi otturigha qoyuldi

“Shiwétsiye islam jem'iyetliri birleshmisi” we “Shiwétsiye imam xatip meslihet kéngishi” qatarliq teshkilatlarning 9-nöwetlik yilliq omumi yighini 10-öktebir küni sitokholmning lunda rayonidiki lunda islam mektipining yighin zalida ötküzüldi.

Shiwétsiyede pa'aliyet qiliwatqan teshkilatlardin “Teklimakan islam medeniyet merkizi”ning mes'uli ömer eziz, bash katipi abdulla kökyarmu yighin'gha teklip bilen qatnashti.

Shiwétsiye islam jem'iyetliri birleshmisi shiwétsiyediki barliq islam medeniyet merkezliri we meschitlerni nazaret qilish, imam xatiplargha meslihet bérish ishlirigha yétekchilik qilidighan eng aliy diniy organ bolup, bu organ shiwétsiyening her qaysi wilayet we sheherlirige jaylashqan 150 din artuq diniy jem'iyet we meschitlerning qanunluq wekili süpitide shiwétsiyediki her millet musulmanlirining qanuni heq-hoquqlirini kapaletke ige qilish üchün xizmet qilidiken.

Organning yilliq omumi yighinida shiwétsiyening her qaysi wilayet we sheherliridin kelgen diniy jem'iyet bashliqliri we meschit imamliri, shiwétsiyediki yérim milyondin artuq her millet musulman ammisining diniy ishlirini tereqqiy qildurush, musulmanlarni shiwétsiye jem'iyitige hesse qoshushqa terghib qilish, din'gha qarshi siyasiy guruhlarning ashqunluqi shundaqla ijtima'iy heqsizlikler tüpeyli meydan'gha chiqqan ümidsizlinish seweblik kélip chiqqan bezi diniy ashqunluq mesililirining négizlik seweb amillirini tetqiq qilish qatarliq mesililerni ilmy muhakime qilip hel qilish chare ‏-tedbirliri üstide söhbet élip bérip, hökümetke doklat yollaydiken.
Bu yighin ikki kün dawam qilghan bolup, bu qétimliq yighin'gha misir we gérmaniyedin nopuzluq diniy alimlar teklip qilin'ghan.

Yighinida asasliq islamning motidilliqini asas qilghan omumi rohini xelq'ara jem'iyetning tonup yetmesliki shundaqla mötidilliq dégen bu muqeddes atalghuni mustebit döletlerning xelqilerge xata halda suy'istimal qilduruwatqanliqi otturigha qoyuldi.

Biz yighin heqqide tepsiliy melumat élish üchün, teklimkan islam medeniyet merkizining bash katipi abdulla kökyarni ziyaret qilduq. U, xitay da'irilirining Uyghur diyarida mötidilliq atalghusini suy'istmal qiliwatqanliqini, Uyghur diniy zatlarni öz idiyisige mayil terbiyilep chiqip, kommunistik idiye we islam otturisidin ghelite bir ebjesh yol hasil qilip, xitay da'irilirining menpe'itige xizmet qiliwatqanliqidek ré'alliqni pakitlar bilen otturigha qoydi.