Türkiyelik Uyghur oqutquchi ürümchi ayrodromidin qayturuwétildi

Hidayetullah göktürk ependining ayropilan'gha chiqish kartisi, pasporti, we toy xéti. 2016-Yili 24-iyun, ürümchi.

Türkiyening istanbul shehiride türkiye ma'arip ministirliqigha qarashliq bir toluq ottura mektepte mu'ellim bolup ishlewatqan hidayetullah göktürk ependi 6-ayning 23-künidin 24-künigiche ürümchi ayrodromda 36 sa'et nazaret astida tutup turulghandin kéyin türkiyege qayturuwétildi.

Bu heqte ziyaritimizni qobul qilghan hidayetullah göktürk ependi, özining 6-ayning 23-küni jenubiy xitay awi'atsiye shirkitining ayropilani bilen ayali we perzentini yoqlash üchün ürümchige qarap uchqanliqini, chüshtin kéyin sa'et töt etrapida ürümchi ayrodromgha yétip barghinida, xitay saqchiliri uninggha, xitayning jama'et xewpsizlikige xeter élip kélish éhtimaling bar, dep nazaret xanigha solap qoyghanliqini bayan qildi.

Hidayetullah göktürk ependi 2016-yili 1-ayning 21-küni ürümchige bérip, ürümchilik bir Uyghur qizi bilen toy qilghan idi. U toy xéti alghili barghanda ürümchi jama'et xewpsizlik idarisi we munasiwetlik organlar uninggha yaxshi mu'amile qilip resmiyetlirini béjirip bergen bolsimu, 5 ay kéyinki bügünki künde uni ayrodromda 36 sa'et 3 saqchining nazareti astida tutup qayturuwetken. U, bu xitayning özining qanunigha we xelq'ara qanun'gha xilapliq qilghanliqini, özining türkiyede dölet kadirlirigha bérilidighan xitaygha wiza telep qilmaydighan pasporti turuqluq bundaq mu'amile qilghan xitayni eyibleydighanliqini tekitlidi.

Hidayetullah göktürk ependi özining xitayni yaxshi chüshenmeydighanliqini, toy qilghili barghanda xitay dölet bixeterliki idarisi, jama'et xewpsizlik idarisi xadimlirining özi bilen yaxshi söhbet élip barghanliqini, buninggha qarap xitayning siyasiti yaxshi bolup kétiptu dep oylighanliqini, dunyaning héchqandaq jayida dadisidin tüpeyli balilirining, baliliridin tüpeyli ata-anilirining jazalandurulmaydighanliqini bayan qildi. Türkiyede tughulup chong bolghan oqutquchi hidayetullah göktürk ependi, enqerege bérip türkiye tashqi ishlar ministirliqigha erz qilip, bu heqsizlikke naraziliq bildüridighanliqini bayan qildi.

Ötken ay yeni 5-ayning 21-küni bir sayahet shirkitining uyushturushi bilen ürümchige barghan 15 türkmu ürümchi ayrodromidin qayturuwétilgen idi. Türkiye istratégiyilik chüshenchiler instituti tetqiqatchisi doktor erkin ekrem ependi bu mesililer heqqide öz qarashlirini otturigha qoydi.