Уйғурларниң йеқин икки дости түркийә баш министириниң баш мәслиһәтчиликигә тәйинләнди

Ихтиярий мухбиримиз әркин тарим
2016-01-06
Share
omer-faruq-qorqmaz.jpg Түркийә җумһурийити баш министири әхмәт давутоғли баш мәслиһәтчи қилип тәйинлигән диний илимләр мутәхәссиси вә инсан һәқлири паалийәтчиси тәтқиқатчи өмәр фаруқ қорқмаз әпәнди. 2016-Йили январ, түркийә.
RFA/Erkin Tarim

Түркийә җумһурийити баш министири әхмәт давутоғли йеқинда мәслиһәтчилирини алмаштурған болуп өмәр фаруқ қорқмаз қатарлиқ 9 кишини баш мәслиһәтчи қилип йеңидин тәйинлигән.

Баш министирниң йеңидин тәйинләнгән баш мәслиһәтчилири түркийә гезитидә бүгүн елан қилинди. Мәслиһәтчиләр арисида язғучи вә оқутқучи сулайман сәйфи, әдәбиятшунас искәндәр пала, сабиқ парламент әзаси муһсин қизил қая, йилмаз әнсароғли, хәлқара мунасивәтләр мутәхәссиси мустафа шән әпәнди, диний илимләр мутәхәссиси вә инсан һәқлири паалийәтчиси тәтқиқатчи өмәр фаруқ қорқмаз әпәнди, нәҗдад су баши, парламент әзаси әхмәт доған қатарлиқлар бар.

Сайламдин илгири вақитлиқ қатнаш министири болған фәридун билгин қатарлиқ 9 киши баш министирниң йеңи баш мәслиһәтчилири болуп вәзипигә тәйинләнгән иди.

Буларниң ичидә өмәр фаруқ қорқмаз әпәнди билән мустафа шән әпәндиләр уйғурларниң әһвалини яхши билидиған уйғур мәсилисигә йеқиндин көңүл бөлүп келиватқан уйғурларниң сәмимий дости болуп улар һәр даим уйғурларниң паалийитигә актип қатнишип уйғурлар дучар болуватқан инсан һәқ вә һоқуқлири дәпсәндичилики тоғрисида тәтқиқатлар елип барған иди.

Өмәр фаруқ қорқмаз әпәнди билән фаруқ шән әпәнди университет оқуғучиси болған вақтидин тартип түркийәдики аммиви тәшкилатларда кейинчә сиясий партийәләрдә актип вәзипә өтәп кәлгән болуп һәр йили дегүдәк түркийәдә уйғурлар тоғрисида чақирилған йиғинларға қатнишип йиғинда уйғур тәшкилатлириниң вә паалийәтчиләрниң ғайидә бирлишиши, уйғурлар дучар болуватқан инсан һәқлири дәпсәндичиликини қандақ қилип ислам дунясиға аңлитиш тоғрисида доклатлар бәргән иди.

Өмәр фаруқ қорқмаз әпәнди пакистан исламабадтики хәлқаралиқ ислам университетиниң ислам дини факултетида динлар тарихи саһәсидә оқуған вә магистирлиқниму шу мәктәптә пүттүргәндин кейин түркийәгә қайтип келип әнқәрәдә "динлар тарихида бүгүнки зәрдушлуқ" дегән тәтқиқат мақалиси билән докторлуқ унваниға еришкән. Кейин бир мәзгил сивас университетида оқутқучилиқ қилған.

Уйғурларниң йеқин икки достиниң түркийә баш министири әхмәт давутошлуниң баш мәслиһәтчиси болуши түркийәдики уйғурларни қаттиқ сөйүндүрди. Униң үстигә бу икки кишиниң инсан һәқлири паалийәтчиси болушиниң уйғурларға қандақ пайдиси болар? дегәнгә охшаш соалларға җаваб тепиш үчүн түркийә сүтчү имам университети оқутқучиси доктор алимҗан буғда вә шәрқий түркистан маарип вә һәмкарлиқ җәмийити баш катипи абләт әпәндиләр билән телефон сөһбити елип бардуқ.

Доктор алимҗан буғда әпәнди түркийә баш министириниң баш мәслиһәтчиси болуп тәйинләнгән өмәр фаруқ қорқмаз әпәндиниң пакистанда оқуватқан вақтидин тартип уйғурлар билән арилишип өткән, уйғур мәсилисини яхши билидиған бир киши икәнликини, бундақ бир кишиниң баш министир мәслиһәтчиси болуп тәйинләнгәнликиниң уйғур мәсилиси үчүн иҗабий рол ойнайдиғанлиқини баян қилди.

У, түркийә-хитай мунасивитидә уйғур мәсилисиниң давамлиқ күн тәртипкә келиватқанлиқини әмма хитай һөкүмитиниң давамлиқ һалда түркийә һөкүмитигә ялған мәлумат бериватқанлиқини, уйғур мәсилини яхши билидиған бириниң баш министирниң йенида болушиниң уйғур дәваси үчүн пайдилиқ болидиғанлиқини баян қилди.

Истанбулда паалийәт елип бериватқан шәрқий түркистан маарип вә һәмкарлиқ тәшкилати баш катипи абләт әпәнди өмәр фаруқ қорқмаз әпәндиниң түркийә баш министири баш мәслиһәтчиси болуп тәйинләнгәнликидин интайин хурсән болғанлиқини баян қилди.

У, бу кишиниң түркийә -хитай мунасивитидә уйғур мәсилисигә иҗабий тәсир көрситидиғанлиқини баян қилди.

Һазирқи йеңи һөкүмәт 4 йил түркийәни идарә қилидиған болуп, бу 4 йил ичидә түркийә-хитай мунасивитидә уйғур мәсилисиниң қандақ тәрәққий қилидиғанлиқи кишиләрниң диққитини тартмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт