Türkiyediki Uyghur teshkilatlar hemkarlishish üchün birleshti

12-Ayning 17-küni sherqiy türkistan ma'arip we hemkarliq jem'iyitining sahibxaniliq qilishi bilen istanbulda pa'aliyet qiliwatqan 10 Uyghur teshkilatning rehberliri we wekilliri bir yerge jem boldi.

Yighin'gha sherqiy türkistan wexpining bash katipi doktor ömer qul we idare hey'et ezasi tibet yüjetürk, sherqiy türkistan ma'arip we hemkarliq jem'iyitining re'isi hidayetulla oghuzxan we idare hey'et rehberliri, sherqiy türkistan yashlar teshkilati re'isi ilhan turanli, yawro-asiya tetqiqat wexpi re'isi abdujélil turan, qutadghu bilik ilmiy tetqiqat we hemkarliq jem'iyiti re'isi abdughéni qutubi qatarliq 10 ammiwi teshkilat hem fond mes'ulliridin bashqa yene türkiyediki Uyghur yurt aqsaqalliri we tetqiqatchilardin proféssor doktor sultan mexmut qeshqerli, ilyaz saka, abdulhekimxan mexsum hajim, proféssor doktor jelal erbay, isma'il jén'giz, doktor erkin ekrem qatarliq 30 gha yéqin muhim shexsler qatniship, özlirining Uyghur mesilisi toghrisidiki qimmetlik pikir-tekliplirini otturigha qoydi.

Yighinda, Uyghur mesilisini küchlük halgha keltürüsh üchün ortaq heriket qilish, öz-ara hemkarlishish toghrisida muzakire élip bérildi.

Yighinda aldi bilen sherqiy türkistan ma'arip we hemkarliq jem'iyitining re'isi hidayetulla oghuzxan söz qilip, yighinning asasiy meqsiti toghrisida toxtaldi.

Yighinda yene abduqadir yapchanning adwokati ibrahim ergin ependi söz qilip, abduqadir yapchanning hazirqi ehwali we qanuniy heq-hoquqliri toghrisida toxtaldi we erkinlikke chiqirish üchün türkiye asasiy qanun sot mehkimisi we yawropa kishilik hoquq sot mehkimisige sunulghan telep-iltimaslarning qanun organliri teripidin tekshürülüwatqanliqini bildürdi.

3 Sa'et dawam qilghan muzakire we munazire netijiside teshkilatlar birlikte heriket qilish we öz-ara hemkarlishish, meslihetlishish shundaqla buningdin kéyin ayda bir qétim topliship pikirlishish qarar qilindi.

Yighinda, Uyghur mesilisi toghrisida aktip xizmet qilish, yighin-murasimlar uyushturup türkiye küntertipige keltürüsh, kishi we teshkilat-organlarni Uyghurlar mesilisi toghrisida yéngi melumatlargha ige qilish, metbu'atlarda bayanat élan qilish, doklat hazirlap kishi we idare jem'iyetlerge teqdim qilish dégen'ge oxshash pa'aliyetlerni qilish teklipliri otturigha qoyuldi hem muwapiq körüldi.

Yighin'gha qatnashquchilarning köpinchisi bu yighin'gha qatnashqanliqidin memnun bolghanliqini, pütün Uyghur teshkilatlarning bir yerge jem bolup muzakire we meslihet élip bérilghanliqidin ibaret ehmiyetlik bir yighin échilghanliqini ipadilidi.

Yighin axirida 2009-yili ürümchi weqesi yüz bergende türkiyediki Uyghur jem'iyet we weqiplerning hemkarliqi bilen birlikte qurulghan “Hör sherqiy türkistan munbiri” ni qaytidin janlandurush teklipi yighin ehli teripidin birdek muwapiq körüldi.

Biz bu yighin toghrisida téximu köp melumatqa ige bolush üchün sherqiy türkistan ma'arip we hemkarliq jem'iyitining re'isi hidayetulla oghuzxan, yawro-asiya tetqiqat wexpining re'isi abdujélil turan, sherqiy türkistan wexpining idare hey'et ezasi tibet yüjetürk, Uyghur ziyaliy abduréshit abdulhemit qatarliq kishiler bilen söhbet élip barduq.