Ilshat hesen kökböre Uyghur amérika birleshmisining 8-nöwetlik re'islikige saylandi

Uyghur amérika birleshmisining 8-nöwetlik qurultiyi we yéngi nöwetlik re'is saylimi 29-may washin'gton waqti chüshtin kéyin sa'et 1:30 da bashlandi. Amérika Uyghur birleshmisining muweqqet re'isi ilshat hesen ependi yighinning bashlan'ghanliqini élan qildi.

Yighinning küntertipi boyiche aldi bilen Uyghur amérika birleshmisining aldinqi nöwetlik re'isining omumiy xizmet doklati we maliye doklati oqup ötüldi. Arqidin muweqqet re'is ilshat hesen ependi birleshmining aldinqi nöwetlik re'is, mu'awin re'is we hey'et ezalirining öz wezipisidin ayrilip, hoquqni yéngi nöwetlik saylam komitétigha ötküzüp bergenlikini jakarlidi.

Saylam komitétining hey'et riyasiti amérika Uyghur birleshmisining nizamnamisige asasen bu nöwetlik re'is saylimigha qatnishidighan namzatlarning isimlikini élan qildi we ularning salahiyitini eskertip ötti.

Bu qétimliq amérika Uyghur birleshmisining re'is saylimigha qatnishidighan 3 neper namzat, yeni ömer qanat, qeyser séyit we ilshat hesen sehnige chiqip, eger saylamda ghelibe qilsa amérikidiki Uyghur jama'itige némilerni qilip béreleydighanliqi heqqidiki pilan-layihelirini otturigha qoydi.

Saylam komitéti amérika Uyghur jem'iyitining yéngi nöwetlik re'isini saylash üchün démokratik usulda bélet tashlashning resmiy bashlan'ghanliqini élan qildi. Jama'et retlik we tertiplik halda bélet tashlidi. Saylam komitéti nazaretchilerning nazariti astida pütün amérikidiki Uyghur jama'iti tashlighan béletlirini sanap chiqip axirqi saylam netijisini élan qildi.

Namzatlardin ilshat hesen kökböre eng yuqiri béletke ériship, amérika Uyghur birleshmisining 8-nöwetlik re'islikige saylandi.

Saylamda ghelibe qilghan ilshat hesen kökböre saylam komitétining riyasetchilikide ay-yultuzluq kök bayraqqa qol bésip turup jama'et aldida qesem berdi hemde amérika Uyghur birleshmisining yéngi nöwetlik re'islik wezipisini tapshuruwaldi. U qizghin chawaklar ilkide jama'etke söz qilip, özining oylighanliri, tesirati, hés-tuyghuliri shundaqla amérikidiki Uyghur jama'itige bolghan teshekkürini izhar qildi.

Yéngi re'is ilshat ependi axirida 8-nöwetlik Uyghur amérika birleshmisining yéngidin teshkillen'gen hey'et ezalirini élan qildi. Ömer qanat, abdughéni, jür'et obul, méhri'ay memtili we musa abdul qatarliq 5 kishi yéngi nöwetlik birleshmining hey'et ezasi bolup körsitildi.