Istanbulda Uyghur teshkilat mes'ullirining bilim sewiyesini ashurush üchün terbiyelesh kursi échildi

Ixtiyariy muxbirimiz arslan
2018-04-17
Élxet
Pikir
Share
Print
Uyghur teshkilat mes'ullirining bilim sewiyesini ashurush kursida doktor tahsin gülxan ependi léksiye bermekte. 2018-Yili 11-aprél, istanbul.
Uyghur teshkilat mes'ullirining bilim sewiyesini ashurush kursida doktor tahsin gülxan ependi léksiye bermekte. 2018-Yili 11-aprél, istanbul.
RFA/Arslan

Istanbulda Uyghurlarning köplep olturaqlishishi bilen arqa-arqidin yéngi teshkilatlar tesis qilinmaqta. Igilinishiche, hazir istanbulda chong-kichik bolup hökümet testiqi bilen resmiy qurulghan 23 Uyghur teshkilat bar bolup, bu teshkilatlarning bezliri ochuq ashkara xizmet qilmaqta.

Sherqiy türkistan teshkilatlar birlikining re'isi hidayetulla oghuzxanning bildürüshiche, bu teshkilatlardin deslepte 8 Uyghur teshkilati jem bolup, "Sherqiy türkistan ammiwi teshkilatlar birliki" namida birlik hasil qilghan we bir yürüsh muhim pa'aliyetlerni birlikte élip bérishta muweppeqiyet qazan'ghan. Hazir bu birlikke bashqa teshkilatlarmu iltimas qiliwatqan bolup, birliktiki teshkilatlarning sani 16 ge yetken.

Hidayetulla oghuzxan bu terbiyelesh kursini uyushturushtiki asasiy meqsiti we ehmiyiti toghrisida toxtilip mundaq dédi: "Sherqiy türkistan mesilisini xelq'aralashturushta teshkilatlarning roli intayin muhim, shuning üchün teshkilatlarning qiyinchiliqliri we ajizliqlirini yoq qilip küchlük bir teshkillinishke yüzliniwatimiz. Bu sewebtin teshkilatlirimizning küchiyishi, xadimlirining kespiy mutexessislishi, xizmet qabiliyitining yüksilishi üchün jem'iyetshunasliq, teshkilatchiliq, istratégiye, xelq bilen bolghan munasiwet, xelq'ara munasiwet, teshwiqat, hésab, boghaltiri dégen'ge oxshash teshkilatqa munasiwetlik téxnikiliq bilimlerni igileshke éhtiyajimiz bolmaqta. Sherqiy türkistan ma'arip we hemkarliq jem'iyiti bu imkaniyetlerni qérindash jem'iyetlerge yaritip bérish üchün 'jem'iyetlerni terbiyelesh kursi' dégen namda bu terbiyelesh kursini uyushturdi".

U yene mundaq dédi: "Bu kurs 9 türlük asasiy témini öz ichige alidu we her hepte bir qétim 2 sa'et élip bérilidu. 9 Heptide axirlishidu. Bu kursning her qaysi qérindash teshkilatlarning tereqqiyati, xizmet-pa'aliyetliride muweppeqiyet qazinishigha türtke bolushini arzu qilimiz".

Igilishimizche, bu programmining tunji qétimliqi 11-aprél küni istanbuldiki sherqiy türkistan ma'arip we hemkarliq jem'iyitining yighin zalida uyushturulghan bolup, yighin'gha ijtima'iy teshkilatchiliq sahesidiki mu'amile we munasiwet mesililiri mutexessisi doktor tahsin gülxan teklip bilen qatniship léksiye berdi. Bu yighin'gha sherqiy türkistan teshkilatlar birlikige eza her qaysi teshkilatning mes'ulliri yaki xadimliridin er-ayal bolup jem'iy 55 kishi qatnashti.

Doktor tahsin gülxan ependi, bu yighinda "Xalisane teshkillinishte tesirlik munasiwet ornitish alahidiliki" dégen témida léksiye berdi.

Doktor tahsin gülxan ependi, bir teshkilatning ghaye-meqsiti, xizmet pa'aliyiti, qolgha keltüridighan ghelibe-netijiliri toghrisida toxtaldi.

Doktor tahsin gülxan ependi, kishilerning aldi bilen bir yerge jem bolushi, birlik-barawerlikni saqlap ilgirilishi, birlikte xizmet qilip netijige érishishning uslubi toghrisida tepsiliy toxtaldi.

Doktor tahsin gülxan ependi ghelibe qilishning usuli toghrisida toxtilip, meqsetning néme bolushidin qet'iynezer uninggha yétish we ghelibige érishish üchün bashqilar bilen munasiwet ornitish we ularni tesirge uchritishqa ehmiyet bérish kéreklikini otturigha qoydi.

Doktor tahsin gülxan ependi, teshkillinishte maslishishning muhimliqini we uning türlirini otturigha qoyup mundaq dédi: "Maslishishning türliri, zéhniyet jehette maslishish, rohi, jismaniy jehettiki maslishish, kimlik, salahiyet jehettiki maslishish, etraptiki muhit bilen maslishish qatarliqlar bolup, maslishishning qedir-qimmetliri-sezgürlük, hörmet qilish we ishenchtin ibarettur".

Doktor tahsin gülxan ependi, Uyghurlarning hazirqi ehwali toghrisida toxtilip, xitay hökümitining atalmish "Qoshmaq tughqanchiliq" namida Uyghurlarning öylirige xitaylarni, ularning xalash-xalimasliqtin qet'iynezer kirgüzüp, ular bilen birge yashashqa teshkillishi Uyghurlarning izzet-abruyini, a'ile we insaniy erkinlikini depsende qilghanliq, shuningdek xelqning sezgür qimmet qarashlirigha hujum qilghanliq bolidighanliqi bildürdi.

Biz bu yighin toghrisida pikir-qarashlirini élish üchün bu yighin'gha qatnashqan "Uyghur ilim we tetqiqat wexpi" ning mu'awin re'isi abdul'ehed uchqun ependi we "Iman diyari telim-terbiye jem'iyiti" re'isi mexmut damollam bilen söhbet élip barduq.

Mexmut damollam bu yighin'gha qatniship, bir teshkilatning aldi bilen néme qilishi kérekliki, mesilini qandaq hel qilish kérekliki, qandaq qilghanda netijige érishkili bolidighanliqi toghrisida chüshenchige ige bolghanliqini bildürdi.
Biz yene bu kursqa qatnashqan fatih sultan mehmet uniwérsitéti oqughuchisi tahirjanning pikir-qarashlirini alduq. Tahirjan bir teshkilatni yürgüzüsh üchün aldi bilen xelqning bir yerge jem bolushi kéreklikini, birlikni saqlighan halda xizmetni dawamlashturush kéreklikini, netijige érishish üchün öz-ara kemchillikni kechürüm qilish, artuqchiliqtin paydilinish arqiliq munasiwetni kücheytishning muhimliqini chüshinip yetkenlikini bildürdi.

Toluq bet