2016-Yili kirishi bilen Uyghur rayonidiki yanfon ishletküchilerge bolghan kontrolluq téximu kücheygen

Muxbirimiz qutlan
2016-01-05
Share
yanfon-uchur-1.jpg Ündidar ishletküchining téléfonining körünüshi. 2015-Yili 4-féwral, xubéy.
Imaginechina

Uyghur rayonidin igiligen neq meydan uchurliridin melum bolushiche, yéngi yilning aldi-keynide xitay saqchilirining rayondiki eqliy iqtidarliq yanfon ishletküchilerge bolghan kontrolluqining hessilep kücheygenliki melum bolmaqta.

Xewer tépishimizche, eqliy iqtidarliq yanfon yaki tor ishletküchilerge bolghan cheklime Uyghur élining jenubiy wilayetliride, bolupmu xoten rayonida hemmidin küchlük iken.

Yéngi yilning aldi-keynide "24 Sa'etlik nöwetchilik" wezipisi ötewatqanliqini bildürgen guma nahiyesining mokuyla yéziliq saqchixanisi "Teweliktiki yashlarning yanfonlirini tekshürüsh we kontrol qilish - bizning da'imliq charlash xizmitimizning muhim bir qismi" dédi.

Xoten wilayitining melum nahiyesidin téléfonimizni qobul qilghan bir neper Uyghur yash xoten teweside ündidar qatarliq ijtima'iy uchur wasitilirini ishlitish mumkin emeslikini delillidi.

Uning bildürüshiche, ötken yilining may éyidin étibaren xoten teweside puqralarning ündidar qatarliq 17 xil ijtima'iy uchur wasitisini ishlitishi birdek toxtitilghan. Eyni chaghda wilayetlik télégraf we köchme téléfon idarisi "Xoten wilayitining muqimliqini közde tutup, intérnét tori bilen baghlan'ghan barliq ijtima'iy uchur wasitiliri mulazimitini waqtinche toxtatqanliqi" heqqide istémalchilargha tékist we awazliq uchur yollighanliqi melum.

U yene xoten teweside eqliy iqtidarliq yanfon ishletkenliki yaki ündidar arqiliq dostlar chembirikige milliy we diniy mezmundiki uchur, qisqa maqalilerni yollighanliqi seweblik awarichilikke uchrighan Uyghur yashlirining köp ikenlikini tilgha aldi.

U axirida yene saqchilarning xoten tewesidiki yol éghizliri we muhim ötkellerde tekshürüsh ponkiti qurup ötken-kechkenlerning téléfonidiki shexsiy uchurlirini tekshüridighanliqini, bezi kishilerning téléfonidiki kichikkine uchurlar seweblik tutqun qilinidighanliqini ilgiri sürdi.

Radi'omiz ziyaritini qobul qilghan saqchixana xadimliridin sirt, asasiy qatlamdiki "Muqimliq" kadirlirimu bu heqte bezi ehwallarni ashkara qildi. Ular ziyaritimiz jeryanida özlirining da'im kent charlap yashlarning téléfonini tekshüridighanliqini, bu ishning ularning kündilik xizmet wezipisining biri ikenlikini bildürdi.

Tepsilatini awaz ulinishtin anglighaysiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet