«Қамақханилар толуқ, тутқун давамлишиватиду, бәзиләрниң қамалған җайи мәлум әмәс»

Мухбиримиз шөһрәт һошур
2017-12-30
Елхәт
Пикир
Share
Принт
Икки нәпәр хитай сақчисиниң «тәрбийәләш мәркизи» ниң алдида турған көрүнүши. 2017-Йили 2-ноябир, корла.
Икки нәпәр хитай сақчисиниң «тәрбийәләш мәркизи» ниң алдида турған көрүнүши. 2017-Йили 2-ноябир, корла.
AP Photo/Ng Han Guan

Мәлум болушичә уйғур елида бу йил 3‏-айда башланған кәң көләмлик «йепиқ тәрбийиләш» долқуни йәнила тохтавсиз һаләттә давам қилмақта. Мухбиримизниң телефон зиярәтлиридин ашкарилинишичә, поскам наһийисиниң ақтам йезисидики сақчи хадимлири гумандар абдусәмәт мәткеримни тутуш үчүн һәрикәттә икән. Мисирдин қайтқан гулҗәннәт тунияз бейҗиң айродромида тутқун қилинғандин буян из-дерәксиз йоқалған. Қарақаш ақасарайдин бүгүн «тәрбийиләш» кә елип меңилғанларниң сани аз дегәндә 30 нәпәр.

Бәзи йәрлик әмәлдарлар аһалиләрни «йепиқ тәрбийиләш» кә елип маңғанда, буниң пәқәт 19‏-қурултайниң бихәтәрлик тәдбири икәнлики, қурултай ахирлашқандин кейин тутқунларниң қоюп берилидиғанлиқини уқтурған. Әмма хитайниң 19‏-қурултийи йепилғиниға икки айчә болған болсиму, әмма «йепиқ тәрбийиләш» долқуни йәнила давам қилмақта.

Ашкарилинишичә, қариқашниң ақсарай йезисида бүгүн аз дегәндә 30 чә киши «йепиқ тәрбийиләш мәркизи» гә елип берилған. 

Поскамниң ақтам сақчилири сәйли йезисидики аһалиләрдин абдусәмәт мәткеримни тутуш үчүн буйруқ чиқарған вә һәрикәт қилмақтикән. Мәлум болушичә, бу йилқи «йепиқ тәрбийиләш» долқунида бир қисим мәктәпләр вә идарә җәмийәт орунлири «йепиқ тәрбийиләш мәркизи» орнида ишлитилгән. Аталмиш «курсантлар» бу мәркәзләргә сиғмиғандин кейин, тутуп туруш мәркизи вә түрмиләргә йөткәлгән. Әң йеқинқи учурдин мәлум болушичә, бәзи җайларда түрмиләрдинму бош орун қалмиған. Мушу сәвәбтин бәзи җайларда бәзи тутқунлар аилә вә кәнт аманлиқ хадимлириғиму намәлум орунларға йөткәлмәктикән. 

Вәзийәттин хәвәрдар кишиләрдин бириниң ашкарилишичә, мисирдин қайтқан корлилиқ 23 яшлиқ оқуғучи гүлҗәннәт тунияз бу 5‏-айда бейҗиң айродромида тутқун қилинған, әмма униң нәгә елип кетилгәнлики мәлум әмәс. Корла қара юлғундики бир аманлиқ мудириниң баян қилишичә, қара юлғун кәнтидин 13 нәпәр аял «қанунсиз диний тәблиғ» қә қатнашқанлиқи үчүн тутулған, әмма улар корлида билингән «тәрбийиләш мәркәзлири» ниң һечбирсигә апирилмиған, униң нәгә әкетилгәнлики мәзкур аманлиқ мудириғиму мәлум әмәскән.

Пикирләр (0)
Share
Толуқ бәт