Uyghur élining jenubida küzlük hashar bashlandi

Muxbirimiz gülchéhre
2015-10-20
Élxet
Pikir
Share
Print
Hashargha mejburlinip östeng chépiwatqan Uyghur déhqanlar. Aqsu.
Hashargha mejburlinip östeng chépiwatqan Uyghur déhqanlar. Aqsu.
Social Media

Heqsiz mejburiy emgek bolghan hashar, Uyghur élide Uyghurlargha qarita hazirgha qeder yürgüzülmekte. Bu ehwal bolupmu Uyghur élining jenubida téximu éghir bolup, yéqindin buyan radi'omizgha kelgen bezi inkaslargha qarighanda, da'iriler muqimliq xizmitini kücheytish bahaniside, Uyghur déhqanlarni közlük yighindin kéyin bikar qaldurmasliq üchün ularni küzlük hashargha heydeshke bashlighan. Bu heqte aqsu we xotendiki déhqanlardin igiligen uchurlardin yaziche irq-östeng emgiki, yol yasash qurulushi dégendek éghir hasharlarni tügitip kelgen déhqanlarning emdilikte kéwez hashirigha mejburliniwatqanliqi melum boldi, her a'ilige kelgen sanni toshturush üchün bezi jaylarda hetta ottura mektep oqughuchilirimu hashargha tutulghan. Bu heqte muxbirimiz gülchéhre igiligen uchurlar diqqitinglarda bolsun.

Gerche, xitay hökümiti hashar emgikini bikar qilidighanliqini 10 yil ilgirila élan qilghan bolsimu, hashar Uyghur élining jenubida éghir derijide dawam qilip kelmekte. Bolupmu, yéqinqi yillarda,xitay hökümitining Uyghur élide atalmish "El rayi qurulushi" dep élip bériwatqan su qurulushi, yol qurulushlirigha oxshash dölet we jaylar mexsus meblegh ajratqan chong qurulush emgekliriningmu Uyghur déhqanlarning zimmisige artilip kéliwatqanliqi shundaqla ularning hashargha ishleydighanliqi tonushluq bir mesile. Shundaqla bu xil qulluq tuzum tüsini alghan chong kichik hasharlarning pesil we waqit ayrimay, yil boyi töt pesilning hemmiside, türlük shekilde, qattiq chare -tedbirler arqiliq élip bériliwatqanliqi ashkarilinip keldi.

Bezi Uyghurlarning radi'omizgha inkas qilishiche, yil boyi étizgha we hashargha ishlep, küzgi yighinlirini emdi tügetken déhqanlar emdilikte yene hashargha heydiliwatqan bolup, bu heqte tepsiliy melumat élish üchün aqsuning shayargha qaratqan téléfon ziyaritimizdin derweqe shayarda küzlük hasharning bashlan'ghanliqi we déhqanlarning kéwez térishke mejburliniwatqanliqi melum boldi. Bir ottura mektep oqughuchisi, bügün kent kadirlirining öyige kirip her a'ilidin ikki adem hashargha bérishi shertlikini uqturghanliqini, öyde anisi ikkisila bolghachqa mektepke barmay hashargha bérishqa mejbur ikenlikini bildürdi. Uning éytishiche da'iriler hashargha chiqmighanlardin jerimane alidiken.

Bu ottura mektep oqughuchining inkasidin kéyin, biz shayar nahiyilik emgek we ijtima'iy mulazimet idarisi bilen alaqileshtuq, bir kishi téléfonni élip özini tonushturushni we hashar toghrisida so'alimizgha jawab bérishni ret qildi :

Biz bu xil hashar emgeklirining bashqa jaylardimu oxshash yolgha qoyulghan qoyulmighanliqini igilesh üchün xotenning qaraqash nahiyisige téléfon qilduq, ottura mektepte oquydighan bir qiz oqughuchi özi turuwatqan kenttiki déhqanlarningmu her hepte dégüdek hashargha bérip turidighanliqini asasen yol we ériq- östeng emgeklirige qatnishidighanliqini bildürdi. Bu qizning éytishiche bezi emgekler bir qanche kün dawamlishidighan bolup déhqanlar öylirige qaytmay ishleydiken. Hashargha barmighanlar künige 100 somdin jerimane töleshke mejbur bolidiken. Xitay hökümitining Uyghur déhqanliri üstidiki bu qanunsiz zulumi xelq'araliq kishilik hoquq organliri teripidinmu izchil türde tenqidke uchrap kelmekte.

Chet'ellerdiki Uyghur pa'aliyetchiliri xitay Uyghurlardiki her qandaq naraziliqni bayqalghan haman qattiq zerbe bérip kéliwatqan bügünki künde xelqning bu xususta resmiy erz qilishi mumkin bolmighanliqi üchün xitayning adaletsiz siyasetlirining biri bolghan hashar emgikiningmu nurghun qarshiliqlarning yüz bérishige seweb bolghan amillarning biri bolup kéliwatqanliqini qeyt qilmaqta.

Toluq bet