Қәшқәрдә хизмәттә пассиплиқ қилған сақчи кесилгән, адәм атқан сақчи өстүрүлгән

Мухбиримиз шөһрәт һошур
2018-01-09
Share
charlash-uyghur-saqchi.jpg Коча чарлаватқан уйғур сақчи. 2015-Йили 17-авғуст, ақсу.
AFP

Қәшқәр шәһәр часа аманлиқ мудириниң паш қилишичә, қәшқәр йеңибазар сақчиханисиниң сабиқ муавин башлиқи, сиясий йетәкчи абләт турап, хизмәт давамида йәни қаттиқ зәрбә долқунида пассип позитсийәдә болғанлиқи үчүн "икки йүзлимичилик" билән әйиблинип, 7 йиллиқ кесилгән. 2015-Йили йүз бәргән қәшқәр тахта көврүк һуҗуминиң баш гумандари атавулла давутни етип өлтүргән, часа коча башқарма сақчихана башлиқи алимҗан, қәшқәр шәһәрлик разведка әтритиниң муавин башлиқлиқиға өстүрүлгән.

Қәшқәр вәзийити һәққидә мәлумат бәргән бир уйғур муһаҗир, уйғур районида нөвәттә давам қиливатқан йепиқ тәрбийәләш долқунида сақчиларға пәвқуладдә юқири тәләп қоюлуватқанлиқи, сақчи хадимлириниң, болупму сақчихана башлиқлириниң делони салмақлиқ билән яки пухта бир тәрәп қилиш позитсийәсиниң хитай даирилири тәрипидин, сиясий чақириққа маслашмаслиқ яки пассиплиқ, дәп қариливатқанлиқи вә бу хил қаралғанларниң вәзиписидин елип ташлиниш яки қамақ җазасиға буйрулуватқанлиқини мәлум қилди. Қәшқәр шәһәр часа аманлиқ мудири, әнә шу хил җазаға учриғанлардин йеңибазар сақчиханисиниң сабиқ муавин башлиқи, сиясий йетәкчи абләт турап һәққидә мәлумат бәрди.

Униң дейишичә, сиясий йетәкчи абләт турап, қайта тәрбийә һәрикәт долқуниға қарита һечқандақ бир наразилиқ пикир баянида болмиған; һәрқандақ бир гумандарни ақлаш яки қоғдаш тиришчанлиқидиму болмиған; пәқәт бәзи делоларни бир тәрәп қилишта әстайидил болғанлиқи вә тәпсилий ениқлашқа тиришқанлиқи, йәни гумандарларни тәрбийәләш мәркизи вә тутуп туруш орунлириға дәрһалла йоллимиғанлиқи үчүн, "сиясий идийәсидә мәсилә бар" дәп қаралған вә "икки йүзлимичилик" билән әйибләнгән. Әмма сиясий йетәкчи абләт үстидики дело униң аилиси вә хизмәтдашлиридинму мәхпий һалда елип берилғачқа; униң "икки йүзлимичилик" билән әйиблинишигә конкрет қайси иш яки қайси делониң сәвәб болғанлиқи мәлум әмәс.

Йәнә вәзийәттин хәвәрдар бир муһаҗирниң баян қилишичә, нөвәттики йепиқ тәрбийә долқуни, адәттә инсап вә бәлгилик әхлақ даирисидә иш беҗиридиған бир түркүм сақчи хадимлириға палакәтчилик елип кәлгән болса, йәнә бир түркүм мәнпәәтпәрәс сақчи хадимлири үчүнму һоқуқини өстүрүш, байлиқ топлаш вә хитай башлиқлири тәрипидин әтиварлинишниң" алтундәк" бир пурситини яритип бәргән. Мәлум болушичә, часа аманлиқ мудири тилға алған қәшқәр шәһәрлик сақчи идариси разведка бөлүминиң муавин башлиқи алимҗан, әнә шундақ пурсәткә еришкәнләрдин бири икән. У, 2014-йили қәшқәрдә йүз бәргән тахтакөврүк һуҗуминиң баш гумандари атавулла давутни әйни чағда вәқәдин бир һәптә кейин панаһланған җайида етип өлтүргәнлики үчүн вә йепиқ тәрбийәләшкә адәм топлашта инсаний меһри шәпқәтни унтуған һалда хизмәт көрсәткәнлики үчүн қәшқәр шәһәрлик сақчи идарисиниң разведка бөлүмигә муавин башлиқлиққа өстүрүлгән. Йәнә бу аманлиқ мудириниң баян қилишичә часа коча башқуруш районидики муқимлиқ кадири әкрәм билән бүвиһәҗәрму, "хизмәткә актип маслашмаслиқ" вә "икки йүзлимичилик ипадиси болуш" гумани билән йепиқ тәрбийә мәркизигә әвәтилгән.

Юқирида тилға елинған қәшқәр тахта көврүк һуҗуми 2015-йили 22-июн күни йүз бәргән. Һуҗум атавулла давут башчилиқидики бир җәмәт кишилири тәрипидин елип берилған. Вәқәдә тахта көврүктики қаравулханиға һуҗум қилинип, 3 нәпәр сақчини өз ичигә һалда 22 киши өлгән. Хитай даирилири вәқәни әйни чағда ахбараттин йошурған болсиму, әмма иккинчи йили қәһриманларни хатириләш мурасимида тахта көврүк һуҗумида өлгән сақчи хадими абдусаттар һаҗини тонуштуруш давамида вәқәниң йүз бәргәнликини етирап қилған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт