D u q “Uyghurluq bedili” ning 4 qit'ediki mes'ullirini élan qildi

Ixtiyariy muxbirimiz ekrem
2019.01.17
uyghurluq-bedili.jpg D u q élan qilghan Uyghurluq bedili mesulliruning tizimliki filimidin süretke élin'ghan.
RFA/Ekrem

Dunya Uyghur qurultiyi “Uyghurluq bedili” ge 16 dölettin 33 neper Uyghurni mes'ul qilip belgilidi.

D u q ning bergen melumatlirigha asaslan'ghanda, qurultay fondi “Uyghurluq bedili” üchün tunji qedemde töt qit'ediki 16 dölettin 33 neper Uyghur siyasiy pa'aliyetchilirini tallap, shu döletlerge mes'ul qilip belgiligen. D u q bügün ularning tizimlikini qurultay axbarat wasitiliride ashkara élan qilip, bundin kéyinki “Uyghurluq bedili” yighish ishlirigha ularning d u q gha wakaliten mes'ul bolidighanliqini jakarlighan.

Melum bolushiche, d u q “Uyghurluq bedili” tüzümini 2018-yili 4-ayda bélgiyede chaqirilghan 2-nöwetlik ijra'iye komitéti yighinida qarardin ötküzgen hem shu yili 5-aydin bashlap ijra qilishqa bashlighan. Bu tüzüm yolgha qoyulghandin kéyin, asiya, shimaliy amérika, okyaniye we yawropadin ibaret töt qit'ede yashawatqan köpligen Uyghurlarning qizghin qollishigha érishken.

D u q ning teshwiqatliridin ashkara bolushiche, “Uyghurluq bedili” muhajirette yashawatqan Uyghurlargha qaritilghan bolup, yéshi 18 ge tolghan her bir Uyghur her ayda oxshimighan miqdarda bedel puli töleydiken. Mesilen, ottura asiyadiki Uyghurlar 1 amérika dolliri, türkiyede yashawatqan Uyghurlar 3 amérika dolliri, yawropa, amérika, awstraliye we yaponiyede yashawatqan Uyghurlar 5 amérika dolliri töleydiken.

D u q ning re'isi dolqun eysa ependi bu heqte toxtalghanda, “Uyghurluq bedili” ning muhajirettiki her bir Uyghurgha milliy, insaniy mejburiyet bolghanliqini tilgha aldi. D u q fondining mes'uli abdujélil ependi bolsa “Uyghurluq bedili” tüzümi yolgha qoyulghandin buyan dunyaning herqaysi elliridiki Uyghurlarning aktipliq bilen awaz qoshup kéliwatqanliqini bayan qildi.

Uyghurlar merkezliship olturaqlashqan ottura asiya jumhuriyetliridiki Uyghur jama'itining “Uyghurluq bedili” ge qarita inkasliri her xil bolup, “Uyghurluq bedili” ning qazaqistan'gha mes'ul wekili sedriddin ependining bildürüshiche, qazaqistandiki mutleq köp qisim Uyghurlar d u q ning bu tüzümige ijabiy baha bermekte iken hemde bu bedel pulini tölesh arqiliq özlirining weten söygüsini, dewagha bolghan qollash héssiyatlirini ipade qilmaqta iken.

D u q rehberlirining bildürüshiche, qurultayning 2019-yilliq xizmet pilanliri ichide “Uyghurluq bedili” sistémisini omumlashturushmu muhim küntertiplerning birige aylan'ghan. Aldimizdiki aylardin bashlap d u q dunyaning herqaysi elliridiki Uyghurlar merkezliship olturaqlashqan dölet we sheherlerning hemmisidila qurultaygha wakaliten ish béjiridighan “Uyghurluq bedili” ning mes'ullirini qisqa muddet ichide turghuzup chiqidiken.

D u q re'isining bildürüshiche, “Uyghurluq bedili” muhajirettiki Uyghur dewasini téximu sistémilashturush, tereqqiy qildurush üchün kespiy xadimlarni köpeytish, dunyaning siyasitige tesir körsitidighan döletlerdiki muhim sheherlerde qurultay merkezliri qurup chiqish qatarliq köp xil sahelerge serp qilinidighan bolup, herqaysi döletlerdiki Uyghur jama'itining bu sistémini qollash qizghinliqi barghanséri yuqiri kötürülmekte iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.