Xitay taratquliri xitayning ichki we tashqi “Düshmen” lirini qandaq hazirlawatidu?

Igilishimizche, xitaydiki resmiy we gheyriy resmiy taratqularning yéqinqi yillardin buyan xitay xelqi arisida tashqi jehette yaponiyege ichki jehette Uyghurlargha qarita milliy öchmenlik keypiyati peyda qiliwatqanliqi melum.

Xitay taratqulirida uzaqtin buyan dawamliship kelgen yaponiyege qarshi éqim yéqinqi mezgillerge kelgende sénkaku taqim arallirining igilik hoquqi mesilisi munasiwiti bilen yuqiri pellige kötürülgen.

Melum bolushiche, xitay taratquliridiki yaponiyege qarshi keypiyat we barghanséri ewjige kötürülüwatqan xitay milletchiliki awam arisidiki gheyriy resmiy taratqulardila emes, belki xitay kompartiyisining kaniyi bolghan “Xelq géziti” ge qeder resmiy taratqulardin orun élishqa bashlighan.

Közetküchilerning qarishiche, xitay hökümitining dölet ichide yaponiyege qarshi milliy öchmenlik keypiyatini ochuq-ashkara teshwiq qilishining melum siyasiy gherez arqisida élip bériliwatqanliqi melum. Bolupmu xitaydiki kündin-kün'ge éghirlishiwatqan ijtima'iy ziddiyetler we kompartiyining chiriklishishi tüpeylidin kélip chiqqan xelq rayidiki jiddiy özgirishlerni bashqa yönilishke burashni meqset qiliwatqanliqi ilgiri sürülmekte.

Közetküchiler birdek xitay kompartiyisi her qétim qiyin ötkelge duch kelgende, xitay xelqide milletchilik keypiyati qozghap awamning hakimmutleq hakimiyetke bolghan diqqitini burap kéliwatqanliqini tekitlimekte.

Qiziqarliqi shuki, xitay taratquliridiki yaponiyege qarshi milliy öchmenlik bilen bir waqitta dölet ichide xitaylarning Uyghurlargha qarshi keypiyatimu axbarat wasitiliri arqiliq ochuq-ashkara otturigha chiqishqa bashlighan. Bolupmu ötken yilqi tyen'enmén'ge hujum qilish weqesi bilen yéqinqi kunming weqesidin kéyin xitay taratquliridiki Uyghurlargha qarshi keypiyat barghanséri ewjige kötürülmekte iken.

Yaponiyede uzun mezgil oqughan we xizmet qilghan, hazir amérikida yashawatqan doktor jür'et obul bu heqte mexsus ziyaritimizni qobul qildi.

U özining yaponiyediki hayat tejribisi we közitishlirini nöwettiki Uyghurlar weziyiti bilen birleshtürüp muhakime qildi. Yéqindin buyan xitay taratqulirida ewj éliwatqan tashqi jehette yaponiyege qarshi éqim bilen xitayning ichki qismidiki Uyghurlargha qarshi keypiyat toghrisida sélishturma élip bardi.

Tepsilatini awaz ulinishtin anglighaysiz.