Bir neper “Milletler ittipqliqi ülgisi” ning korladiki terbiyelesh merkizide körgen-anglighanliri (3)

“Xenzudin bala béqiwélipmu, a'ilemning bixeterlikini qoghdiyalmidim”

Melum bolishiche, korladiki 4 neper meshhur “Milletler ittipaqliqi ülgisi” din biri bolghan naman bawudun ikki yilning aldida ikki yashliq bir xitay yétim balini béqiwalghan. Uning xitaylargha sadaqet ipadilep basqan bu chong qedimimu uning a'ile tawabi'atlirining bixeterlikini kapalet astigha alalmighan. Uning “Teshwiqat nemunichisi” bolghan ayali bu yil 10‏-ayning béshidin bashlap qamaqqa élin'ghan؛ ichkiride oqush püttürüp saqchixanigha orunlashqan qizi apisining atalmish “Jinayiti” seweplik saqchiliq xizmitidin élip tashlan'ghan.

Korladiki “Milletler ittipaqliqi ülgisi” naman bawudunnning bayan qilishiche, u xizmet we sadaqiti seweplik etiwarliniwatqan we teqdirliniwatqan yilliri, yeni ikki yilning aldida “Közige issiq körün'gen” ikki yashliq bir xitay balini béqiwalghan. U béqiwalghan xitay bala nöwette 4 yashta. Uning “Milletler ittipaqliqi” xizmitide körsetken bu sadaqiti, basqan bu qedimi, bu yilqi siyasiy dolqunda uning a'ile-tawabi'atining bixeterlikini qoghdashta kargha kelmigen. U sékritar mezgilide qurghan gélem karxanisi eyni chaghda yéziliq hökümetning qollishigha érishken bolsimu, emma karxanida ishlewtqanlar arsida atalmish “Qanunsiz diniy matiriyallar” ni körgenler bayqalghachqa, karxanini bashquriwatqan ayali patigül dawutmu qamaqqa élin'ghan.

Melum bolushiche, naman bawudun a'ilisi eslide 3 nopusluq bolup, her üchilisi partiye ezasi iken. Er-kent sékrétari we milletler ittipaqliqi ülgisi, ayal-teshwiqat nemunichisi we yardemchi ayallar mudiri؛ qiz-xitay ölkiliride toluq otturini püttürgen, yéziliq saqchi xadimi iken.

“Teshwiqat nemunichisi” bolghan patigül dawut bu yil 10-ayning 9-küni tutulghan we atalmish “Terbiyelesh merkizi” ge ekétilgen. Nöwette u bir mehel özi terbiyeligen, “Esebiylik” tin uzaq turush heqqide agahlandurghan kentiki ahaliler bilen birlikte, “Terbiye” lenmektiken. Tutulghinigha 3 ayche bolghan bolsimu emma uning qaysiy “Terbiyilesh merkizi” de terbiyeliniwatqanliqi, éliwatqan“Terbiye” sining qaysiy mezmun yaki shekilde ikenliki we salametlik ehwali heqqide héchqandaq uchur melum emes. Qizi anisi tutulup bir heptidin kéyin saqchiliq xizmitidin toxtitilghan. A'ilisidiki saqchi küy'oghulmu bu aqiwetning aldini alalmighan.

Melum bolushiche, naman bawudun ikki heptining aldida saqchixanigha soraqqa élip kélin'gen. U, özi béqiwalghan 4 yashliq xitay balini saqchixanigha özi bilen bille élip kelgen bolsimu, uning soraqtin qutulushigha seweb bolalmighan. U saqchixanida tutup turuluwatqanda béqiwalghan xitay balini üstelge yatquzup, tang atquche dümbisini silap chiqqan bolsimu, emma bu pepileshler saqchilarni tesirlendürelmigen.