Хитай японийәдә “биңтуән ақ ташлиқ китаби” ни тарқитишқа башлиди

Ихтиярий мухбиримиз һаҗи қутлуқ қадири
2016-11-30
Share
bingtuen-aq-tashliq-kitab.jpg Хитай японийәдә тарқитишқа башлиған “шинҗаң ишләпчиқириш-қурулуш армийәсиниң тарихи вә тәрәққияти” намлиқ ақ ташлиқ китабниң япончә тәрҗимә нусхисиниң муқависи.
RFA/Qutluq

Японийәдики мунасивәтлик кишиләрниң ашкарилишичә, йеқиндин буян токйодики хитай әлчиханиси вә бир қисим шәһәрләрдики хитай консулханилири хитай дөләт ишлири ахбарат ишханиси тәрипидин түзүлгән “шинҗаң ишләпчиқириш-қурулуш армийәсиниң тарихи вә тәрәққияти” намлиқ ақ ташлиқ китабниң япон тилидики тәрҗимә нусхисини һәқсиз тарқитишқа башлиған.

“шинҗаң ишләпчиқириш ‏- қурулуш армийәсиниң тарихи вә тәрәққияти” намлиқ ақ ташлиқ китабтики мәлуматларға қариғанда, китаб әсли 2014-йили 10-айда хитай дөләт ишлири ахбарат ишханиси тәрипидин хитай тилида түзүлгән китабқа асасән япон тилиға тәрҗимә қилинған болуп, мәзкур китаб хитай чәтәл тиллири нәшрияти тәрипидин нәшргә тәйярланған.

Китабниң кириш сөз қисмида дейилишичә, “1949-йили шинҗаң тинчлиқ билән азад болғандин кейин, икки миң йилдин буян чөл-баяван вә қумлуқ басқан бу маканда 1954-йили хитай мәркизи һөкүмити мәхсус қарар мақуллап биңтуән қурулған. Һазирғичә болған 60 нәччә йилдин буян қумлуқ ичидики бу диярда биңтуән тиришип-тирмишип ғайәт зор нәтиҗиләрни қолға кәлтүргән. Уйғур елиниң иқтисади вә санаити гүллинип, деһқанчилиқта зор көләмдә боз йәрләр ечилған.”

Китаб җәмий төт бабтин тәркиб тапқан болуп, униңда асаслиқи “чегра районни қоғдаш вә муқимлиқни сақлаш җәһәттә, ишләпчиқириш-қурулуш армийәсиниң 14 девизийәсиниң һәр җәһәттин үзлүксиз тәрәққий қилип гүлләнгәнлики вә һоқуқ даирисиниң кеңәйгәнлики” билдүрүлгән.

Мәзкур китабтики мәзмунлардин толуқ вақип болған японийә уйғур җәмийитиниң рәиси илһам маһмут бу һәқтә тохталди.

Японийәдики хитай консулханилириниң мәзкур ақ ташлиқ китабни тарқитиш сәвәблири һәққидә японийә уйғур бирлики тәшкилатиниң рәиси турмуһәммәт һашим қисқичә тохталди.

Японийәдә чиқидиған япон тилидики “хитайға нәзәр” журнилиниң баш муһәррири манҗу язғучи мең ша китабқа баһа берип:“хитай компартийәси қурулғандин тартип та һазирғичә өзиниң тарихини вә өзидики реаллиқларни бурмилап китаб йезиватиду. Хитай компартийәси уйғур, тибәтләрниң вә шундақла дуняниң байлиқини игиләш нийитидә хәлқара җәмийәтни бу хилдики сахта тәшвиқатлар билән алдап келиватиду. Шуңа дуня хәлқи, хитайниң көз бояйдиған тәшвиқатлиридин һошяр болуши керәк” деди.

Турмуһәммәт һашим японийәдә елип бериливатқан уйғур давасини тәшвиқ қилиш паалийәтлиридә уйғур елидики биңтуәнниң маһийити тоғрисида бир қисим тәшвиқатлар вә мақалиләр елан қилинғанлиқи үчүн, японийәдики бир қисим ширкәтләрниң биңтуән билән болған сода алақисини үзгәнликини илгири сүрди.

Японийәдики бир қисим көзәткүзчиләр, мәзкур китабта дейилгән мәзмунлардин биңтуәнниң уйғур елидики өлкә дәриҗилик алаһидә орган икәнлики шундақла биңтуәнниң һәр қайси девизийәлири мәхпий қоралланған әскирий қисимлар икәнлики ашкариланғанлиқини оттуриға қоймақта.

Хитай ахбаратлиридин мәлум болушичә, 2016-йили12-май күни хитайниң уйғур елидики ишләпчиқириш-қурулуш армийиси ахбарат елан қилиш йиғини өткүзүп, “13-бәш йиллиқ пилан программиси”ни елан қилған болуп, мәзкур программида биңтуәнниң ишләпчиқириш омумий қиммитини 2020-йилиға барғанда 33 милярд сомға йәткүзүш пиланланған.

Юқириқи аваз улинишидин тәпсилатини аңлаң.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт