Йәкәндә җиддий һаләт йүргүзүлгән

Йәкәндә йүз бәргән бир қатар қанлиқ тоқунушлардин кейин наһийә тәвәсидә һәрбий һаләт йүргүзүлгәнлики, үч күндин буян йәкәндин қошна наһийәләргә қатнайдиған қатнашниң тохтитилғанлиқи һәмдә хитай һәрбий қисимлириниң йәкәнгә йөткәп келинип мәктәп вә башқа муһим орунларға орунлашқанлиқи мәлум.

Игилигән учурлардин мәлум болушичә, йәкәнниң елишқу базири тәвәсидә роза һейт мәзгилидә йүз бәргән бир қатар қанлиқ тоқунушлар пүтүн қәшқәр вилайитиниң вәзийитини җиддийләштүрүвәткән.

Йәкәнгә қошна наһийәләрдиму җиддийчилик көрүлгән. 3 Күндин буян интернет тори қамал қилинип, үндидар қатарлиқ иҗтимаий таратқуларни ишлитиш мумкин болмиған. Йәкән наһийәлик партком вә қәшқәр вилайәтлик партком буйруқ чүшүрүп һәрқандақ шәхс вә орунниң мәзкур вәқә һәққидә таратқуларға мәлумат бериши яки бу һәқтә гәп қилишини чәклигән.

Йәкән наһийәсидики идарә-җәмийәтләр вә пуқраларниң телефонлири үзүветилгән яки контрол астиға елинған. Буниң билән пүтүн йәкән хәлқи еғир сиясий бесим вә вәһимә ичидә еғизи сөзлимәйдиған, көзи көрмәйдиған, қулиқи аңлимайдиған һаләткә өтивелишқа мәҗбур болған.

Йәкән наһийәлик тез йолланма ширкитидә ишләйдиған бир уйғур хадим телефонимизни қобул қилған болсиму, лекин әтрапта һөкүм сүрүватқан вәһимилик кәйпият түпәйли очуқ-ашкара гәп қилишқа петиналмиди. Әмма гәп арилиқида у йәкән наһийәсиниң һәрқайси йеза-базар вә йоллириниң қамал қилинғанлиқини, тинчсиз вәзийәтниң техичә давамлишиватқанлиқини вә интернет торниң үзүлгәнликини билдүрди.

Вәқә йүз бәргән елишқу базириниң мәлум кәнт секретари турғун һидайәт бүгүн иккинчи қетим телефонимизни алған болсиму, лекин вәқә һәққидә еғиз ечишни қәтий рәт қилди. У сирттин телефон бәргән һәрқандақ мухбир әгәр өзиниң исим-фамилиси, кимлик номури, мухбирлиқ кинишка номури вә телефон номурини очуқ көрсәтмисә, соалларға җаваб бәрмәйдиғанлиқини билдүрди.

Йәкәнниң ханди базарлиқ оттура мәктәпкә телефон қилғинимизда, телефонни мәктәп хадимлири әмәс, бәлки хитай һәрбий қисимлириниң нөвәтчи хадими алди. У һәрбий қисимниң йеқинда мәктәпкә йөткилип орунлашқанлиқини, йәкәндики тоқунушниң техи тамамән тинчитилип болунмиғанлиқини ашкара қилди. Һалбуки, у бизниң бу һәқтә ичкириләп сориған соаллиримизға давамлиқ җаваб беришни рәт қилди.

Йәкәнгә қошна поскам наһийәлик тез йолланма ширкитиниң бир хитай хадими телефонимизни қобул қилип, 3 күндин буян йәкән билән башқа наһийәләр арисидики тез йолланма мулазимитиниң қатнаш үзүлгәнлики сәвәблик тохтап қалғанлиқини билдүрди.

Тәпсилатини аваз улиништин аңлиғайсиз.