Tutush buyruqi chiqirilghan zakir yasin yéqinda qolgha élin'ghanliqi melum

Muxbirimiz qutlan
2014.12.18
mesuliyet-surushturushke-maslishish-uqturushi-hojjet.JPG Xoten langru yéziliq xelq hökümiti chiqarghan “Mes'uliyet sürüshtürüshke maslishish uqturushi”.
RFA/Erkin Tarim


Radi'omizning igilishiche, bu yil 9 - ayning 19 - küni xoten nahiye langru yéziliq hökümet nusuy kentide olturushluq zakir yasin a'ilisige “Mes'uliyet sürüshtürüshke maslishish uqturushi” chiqirip, uning 2 kün ichide yéziliq saqchixanigha özini melum qilishini uqturghan.

Uqturushta mundaq déyilgen: “Xoten nahiye langru yéza nusuy kent 1 - mehellide olturushluq zakir yasin, er, bashlan'ghuch medeniyet sewiyesige ige, kimlik nomuri yoq, hézbot teshilatigha chétishliq dep békitilgenliki üchün 2014 - yili 9 - ayning 20 - künidin 22 - künigiche bolghan ariliqta langru yéziliq saqchixanigha özingizni melum qilishingiz üchün bu uqturush tarqitildi. Eger belgilen'gen muddet ichide xizmitimizge masliship özingizni melum qilmisingiz, töwendikidek aqiwetlerning kélip chiqishigha mes'ul bolisiz.”

Uqturushta uning nopusining bikar qilinidighanliqi, yerliri qayturiwélinidighanliqi, mal - mülkining musadire qilinidighanliqi, öy - jayi chéqilip tüzliwétilidighanliqi shuningdek barliq uruq - tughqanlirining behriman boluwatqan her türlük étibar siyasetliri emeldin qaldurulidighanliqi eskertilgen.

Biz mezkur uqturushtiki uchurlargha asasen langru yéziliq saqchixananigha téléfon qilduq. Téléfonni alghan nöwetchi saqchilardin biri zakir yasinning hazirgha qeder tutulmighanliqini, saqchilarning uning öyige birqanche qétim tutqili barghan bolsimu, lékin uning qéchip ketkenlikini ashkara qildi.

Yene bir nöwetchi saqchi zakir yasinning xoten nahiyesi tewesidiki hézbottehrir teshkilatigha chétilghan gumandar ikenlikini, bu teshkilattiki on nechche gumandarning téxiche qéchip yürgenlikini ilgiri sürdi.

Biz yenimu ilgiriligen halda nusuy kentidiki saqchi emeldari zulpiqargha téléfon qilduq. U bu ehwaldin xewerdar ikenlikini bildürgen bolsimu, lékin bu heqte tepsiliy uchur bérishni ret qildi.

Axirida biz nusuy kentining sékritari emerge téléfon qilduq. U zakir yasin heqqide rastinla 9 - ayda tutush buyruqi chiqirilghanliqini, lékin u belgilen'gen muddette özini melum qilmighanliqi üchün saqchilarning uni izdep yürgenlikini étirap qildi.

U ziyaritimiz jeryanida zakir yasinning hézbottehrir teshkilatigha qatnashqan dégen guman bilen tutushqa uqturush chiqirilghanliqini, uning 9 - ayda qéchip ketken bolsimu, lékin yénida kimliki yoqluqini tilgha aldi.

Axirida u, buningdin bir hepte ilgiri gumandar zakir yasinni nusuy kentidiki saqchi bashliqi zulpiqarning ishxanisida körgenlikini, uning teqdirining qandaq bolghanliqi heqqide éniq melumati yoqluqini ilgiri sürdi.

U yene zakir yasin bilen bille hézbottehrir teshkilatigha chétishliq dep guman qilin'ghan mezkur kenttiki yene bir Uyghurning qéchip yürgenlikini we hazirghiche tutulmighanliqini bildürdi.

Tepsilatini awaz ulinishtin anglighaysiz.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.