“Erkinlik longqisi” ni gollandiye Uyghur yashlar partiyisi komandisi utti

“Erkinlik longqisi” ni talishish tunji qétimliq musabiqisidin körünüsh. 2011-Yili 30-iyul, gollandiye.

7-Ayning 30-küni shenbe “Erkinlik longqisi”ni talishish musabiqisining eng axirqi hel qilghuch küni. 29-Iyul küni amérika, fransiye, gérmaniye, bélgiye, shwétsiye, gollandiye, norwégiye qatarliq 7 dölettiki Uyghurlargha wakaliten kelgen 7 komanda arisida dawam qilghan tallinish musabiqiside herqaysi komandilarning érishken netijiliri xulasilinip, gérmaniye fch myunxén putbol komandisi bilen fransiye tarim komandisi 3-derijini talishish pursitige, gollandiye bilen shwétsiye Uyghuristan komandisi 1-likni talishish sheripige érishken.

RFA/Pidaiy

Bu eng axirqi ikki meydanliq  musabiqide aldi bilen gérmaniye Uyghur komandisi bilen fransiye tarim Uyghuristan komandisi 3-likni talishish üchün meydan'gha chüshti. Aldinqi we kéyinki yérim meydanlarda her ikki terep qattiq térikiship 1=1 netije bilen tengliship qalghandin kéyin, waqit we shara'itqa asasen 11 qedemdin top tépish arqiliq ghelibini muqimlashturush belgilendi. Bu qa'idige asasen, her ikki komandining ezaliri waratagha top tépish netijiside gérmaniye fch myunxén putbol komandisi 5=2 netije bilen fransiye tarim putbol komandisini yéngip chiqip 3-derijige érishti.

Andin bu nöwetlik Uyghur“Erkinlik longqisi”ning chémpiyonluqini talishidighan gollandiye Uyghur yashlar partiyisi putbol komandisi bilen shwétsiye Uyghuristan putbol komandisi meydan'gha chüshti.

Meydan ehlini hayajan we iptixargha chömdürgen bu musabiqining aldinqi yérim meydanida shwétsiye Uyghuristan komandisi 1=3 netije bilen üstünlükni igiligen bolsimu, kéyinki yérim meydanda gollandiye Uyghur yashlar partiyisi putbol komandisi arqa-arqidin üch top urup, 3 ge qarshi 4 netije bilen shwétsiye Uyghuristan putbol komandisini yéngiwaldi. Shuning bilen gollandiye Uyghur yashlar partiyisi putbol komandisi tunji qétimliq “Erkinlik longqisi”ni talishish musabiqisining chémpiyonluqigha érishti.

Musabiqe netijisige asasen, dunya Uyghur qurultiyi teripidin ewetilgen perqliq mexsus longqilar 1-liktin 3-likkiche netijige érishken gollandiye, shwétsiye we gérmaniyidin ibaret üch komandigha teqdim qilin'ghandin bashqa, chémpiyonluqqa érishken gollandiye Uyghur yashlar putbol komandisi 5000 dollar neq pul bilen mukapatlandi.

Axirida dunya Uyghur qurultiyi we yawropa döletliridiki moysipitlar we rehbiri xadimlarning yétekchilikide yépilish murasimi ötküzülüp, Uyghur yashlirigha ümid-éshench we dostluq béghishlighan bu pa'aliyetke yuqiri baha bérildi.

Murasimdin kéyin, hayajan we jenggiwar rohqa tolghan Uyghurlar bir-biri bilen quchaqliship dostlashti we xatire resimge chüshti.

Shuning bilen chet'eldiki Uyghurlar tarixidiki tunji nöwetlik “Erkinlik longqisi” ni talishish putbol musabiqisi ghelibilik axirlashti. Emma, uning muhajirettiki Uyghurlargha béghishlighan xushalliqi untulmas xatirige aylandi.