شۋېتسىيىدە داڭلىق مۇزىكانت كۈرەش كۈسەنگە ئاتاپ مەخسۇس يىغىن چاقىرىلدى

5-ئاينىڭ 27-28-كۈنلىرى شۋېتسىيىنىڭ پايتەختى ستوكھولمدا ئۆتكۈزۈلگەن بۇ يىغىنغا شۋېتسىيىدىكى ھەرقايسى ئۇنىۋېرسىتېتلاردىن كەلگەن مۇزىكا تەتقىقاتچىلىرى، ئوقۇتقۇچى-ئوقۇغۇچىلار، مۇزېي مۇدىرلىرى، مەرھۇم كۈرەش كۈسەننىڭ دوستلىرى ۋە ئۇيغۇرلاردىن بولۇپ 200 ئەتراپىدا كىشى قاتناشقان.

يىغىندا كۈرەش كۈسەننىڭ ناخشىلىرى توپلىمى، يەنى ئىككى تىلدا چىققان CD پلاستىنكىسى بىلەن كۈرەش كۈسەننىڭ ھاياتى بايان قىلىنغان كىتاب تونۇشتۇرۇلغان.

ئىككى تىلدا نەشر قىلىنغان بۇ CD پلاستىنكىسىغا كۈرەش كۈسەننىڭ 10 ناخشىسى كىرگۈزۈلگەن بولۇپ، بۇنى شۋېتسىيە دۆلەتلىك ئاۋاز ئارخىپى مۇزېيى باشلىقى، داڭلىق مۇزىكانت دان لۇندبېرگ، CD لايىھىلىگۈچى ئاندېرس ھاممارلۇند، مەرھۇم كۈرەش كۈسەننىڭ ناخشا-تېكىستلىرىنى شۋېتچىگە ۋە ئىنگلىزچىغا تەرجىمە قىلغۇچى مەشھۇر يىپەك يولى مەدەنىيىتى تەتقىقاتچىسى پاترىك ھالزون، داڭلىق فوتوگراف روگېر پېدېرسېن قاتارلىق كىشىلەر ئورتاقلىشىپ تەييارلىغان.

بۇ CD پلاستىنكىسى كۈرەش كۈسەن ئەپەندىنىڭ ۋاپاتىنىڭ 5 يىللىق خاتىرىسىگە ئۈلگۈرتۈپ نەشر قىلىنغان بولۇپ ئىنتايىن مۇھىم ئەھمىيەتكە ئىگە. بىز بۇ يىغىن ھەققىدە تېخىمۇ تەپسىلىي مەلۇمات ئېلىش ئۈچۈن بۇ يىغىنغا قاتناشقان مەرھۇم كۈرەش كۈسەننىڭ ئايالى بەختىگۈل خانىم بىلەن سۆھبەت ئېلىپ باردۇق.