Peyziwatta yüz bergen 27 ‏ - awghust qizil buya weqesi heqqide tepsiliy melumat (1)

Uyghur élidiki tekshürüsh ponkitlirining biride, xitay saqchi bir Uyghur qizning salahiyitini tekshürüp soraq qilmaqta. (Orni we waqti éniq emes)

 Saqchi: " qolidiki pichaqtiki qan yuquni körüp qachtim ..."

Hujumchilar pichaq bilen 2 saqchini öltürgen, 4 nepirini yarilandurghan, qalghan saqchilar qéchip ketken. Ene shu neqmeydandin qachqan saqchilardin biri weqeni töwendikidek tepsili bayan qilidu.

Eslide bu künki tekshürüsh herikiti, 12 ‏ - awghust küni yéngisheher nahiyisining yaman yar yézisida yüz bergen déloni pash qilish üchün élip bérilghan.

Peyziwat nahiyilik saqchi idarisining bashliqining ashkarilishiche, 12 ‏ - awghust küni yaman yar weqesi yüz bérip 3 neper amanliq xadimi namelum kishiler teripidin boghuzlap öltürülgendin kéyin, qeshqer saqchi da'iriliri yaman yargha qoshna bolghan peyziwatning misha we qizil buya yézisini nuqtiliq tekshürüsh obyékti qilghan.

Peyziwat saqchi idarisi aldi bilen nahiyidiki talip yashlarni tizimlighan we bularning ichidiki turaqsiz yashawatqan yeni peyziwat sirtidiki jaylargha bérip kélip turiwatqan talip yashlarni nuqtiliq tekshürgen. Tekshürüsh netijiside abduréyim ehet qatarliq yette kishi arisida teshkiliy alaqe barliqini bayqighan we ularning nopusliri tizimlan'ghan jayda yoqluqini bayqighan.

Buninggha asasen bu yette kishini yaman yar weqesining gumandarliri qilip békitken we ular üstidin tutush buyruqi chiqarghan. Tutush buyruqi chiqirilghan gumandarlar: abduréyim ehet, qéyim bawudun, imam hesen, hesen hoshur we abdusalam sultan qatarliqlar bolup, ularning chongi 36 yash, kichiki 24 yash iken.

Saqchi bashlighi: " hujumchilar qéchip ketti, dawamliq izdewatimiz"

Saqchilar tekshürüsh jeryanida yene bu yette kishilik guruppini misha yézisidiki anargül mutellip isimlik qizning yoshuriwatqan bolushi mumkinlikini perez qilghan. Saqchilar anargülni izdep misha yézisigha barghan we anisi aman'guldin ehwal igiligen.

Anargülning qizil buya yézisigha toy qilip ketkinini uqqan saqchilar, qizil buya yézisigha barghanda uning chöp orush üchün qonaqliq étizigha ketkenlikini uqqan. Bu uchurgha asasen qonaqliqta tekshürüsh élip barghanda mezkur weqe yüz bergen.

Peyziwat saqchi idarisi qonaqliqta weqe gumandarlirini emes, peqet gumandarlargha yardem qildi dep perez qilghan anargülni izdimekchi bolghini üchün qoralsiz saqchilarni ewetken. Weqedin kéyin qoralliq qisim heriketke ötken bolsimu gumandarlarni tutushqa ülgürmigen.

Qizil buya saqchi ponkitidiki bir saqchining bildürüshiche, bu ponkitta 21 saqchi bolup, ulardin 20 si Uyghur bir nepiri xitay, ularda peqet ikkila qoral bar iken.

Yerlik ahale: " weqelerge sewep boluwatqan hökümetning bésimi"

Peyziwat saqchi bashliqining bildürüshiche, nöwette saqchi, esker bolup 500 kishi jiddiy herikette, ular peyziwatning qizil buya we misha yézisidiki étiz - ériq we öy - makanlarni jiddiy axturmaqta.

Saqchi bashliqining bildürüshiche, peyziwatta ikki heptidin béri "gilem tazilash" namidiki öy axturush élip barghan. Axturushtin hazirgha qeder emeliy netije chiqmighan.

Nöwette saqchi da'iriliri yaman yar weqesining gumandarlirini tutushta, xelqning saqchilargha masliship bermeywatqanliqidin, eksiche gumandarlarni yoshurup kéliwatqanliqidin shikayet qilmaqta.

Peyziwat ahalisi bu weqelerni peqet Uyghurlargha qarita bésimning küchlüklükidin peyda bolghanliqini bayan qilmaqta.