Далай лама франсийә президентиниң ханими вә ташқи ишлар министири билән көрүшти

Тибәт роһани даһиси далай лама җүмә күни франсийә президентиниң ханими карла саркозий вә франсийә ташқи ишларминистири бернард кочинерлар билән көрүшүп, хитайни демократийә йолида илгириләшкә чақирди.
Мухбиримиз әркин хәвири
2008-08-22
Share

Улар җүмә күни җәнубий франсийидики бир будда ибадәтханисиниң ечилиш мурасимида учрашқан болуп, мурасимдин кейин айрим сөһбәт өткүзгән. Далай ламаниң франсийилик тәрҗимани матю ричард көрүшүштин кейин мухбирларға далай ламаниң җуңгониң "хәлқарадики иззәт ‏ - абройини тәкрар тикләшниң бирдин ‏ - бири йоли демократийә йолида илгириләштур " дәп тәкитлигәнликини елан қилди.

Далай лама будда ибадәтханисиниң ечилиш мурасимида сөз қилип, динлар оттурисидики иттипақлиқни сақлаш вә муһитни қоғдаш тоғрисида тохталған. Ечилиш мурасимиға қатнашқан 2000 дәк меһман ичидә франсийиниң кишилик һоқуқ министири рама яде вә сабиқ баш министир алейн җуппелар бар иди. Далай ламаниң баянатчиси, франсийә президентиниң ханими карла саркозийниң далай ламаға президент николас саркозийниң салимини йәткүзгәнликини билдүрди.

Хитай һөкүмити илгири франсийә президентини агаһландуруп, әгәр саркозий далай лама билән көрүшсә икки дөләт мунасивитидә " еғир ақивәт" келип чиқидиғанлиқини тәкитлигән иди. Бейҗиң һөкүмити чаршәнбә күни франсийини бу тоғрисида йәнә бир қетим агаһландуруп, хитайниң тибәт мәсилисидики"сәзгүрлүки вә мәсилиниң муһимлиқи" ға җиддий қарашни тәкитлигән.

Президент саркозий хитай һөкүмити март ейида лхаса исянини бастурғандин кейин, олимпик мусабиқисини байқут қилидиғанлиқини агаһландурған болсиму, лекин кейинрәк бу нийитидин ваз кечип, олимпикниң ечилиш мурасимиға қатнашқан иди. Далай ламаниң икки һәптилик франсийә зиярити шәнбә күни ахирлишиду. У, пәйшәнбә күни "ле монде " гезитигә 14 ‏ - март лхаса вәқәсидин кейин аз дегәндә 400 нәпәр тибәтниң хитай бихәтәрлик қисимлири тәрипидин өлтүрүлгәнликини билдүргән.
 
Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт