Хитай албанийә һөкүмитидин 5 уйғурни қайтуруп беришни тәләп қилди


2006.05.08

Хитай дүшәнбә күни албанийә һөкүмитидин гуәнтанамодин қоюп берилгән 5 нәпәр уйғурни хитайға қайтуруп беришни тәләп қилди.

Америка бирләшмә агентлиқиниң хәвәр қилишичә, хитайниң албанийидики баш әлчиси тйән чаңчүнниң албанийә һөкүмитигә йоллиған баянатида, бейҗиң һөкүмитиниң бу бәш нәпәр уйғурни дәрһал хитайға қайтуруп беришни тәләп қилидиғанлиқи көрситилгән. Шундақла униңда бу уйғурларни "хитай пуқралиқидики 5 нәпәр террорчи" дәп сүпәтлигән.

Хитай һөкүмити баянатида йәнә, албанийә һөкүмитиниң бу уйғурларға сиясий панаһлиқ беришигә күчлүк қарши чиқидиғанлиқини билдүрүп," хәлқара қанунлар бойичә, бу кишиләр хитайға қайтурулиши керәк" дегән. Албанийә һөкүмити болса, нөвәттә бу уйғурларниң сиясий панаһлиқ илтимасини қобул қилғанлиқини, һазир қануний рәсмийәтләр беҗириливатқан болуп, бу җәрянға 2 айдәк вақит кетидиғанлиқини билдүрди.

Бу уйғурлар 2001‏- йили америкиниң афғанистанда елип барған һәрбий һәрикитидә қолға елинип, америкиниң гуәнтанамодики түрмисигә соланған иди. Кейин америка һөкүмити уларниң террорист әмәсликини көрситип, уларни " хата вақитта хата җайда туруп қалған" гунаһсиз кишиләр дәп елан қилған. Гәрчә америка бу 22 нәпәр уйғурни америкида елип қелишқа қошулмиған болсиму, лекин уларни үчинчи бир дөләткә әвәтишкә тиришқан. Нәтиҗидә уларниң арисидики 5 и җүмә күни албанийә һөкүмити тәрипидин қобул қилинған. Албанийә ички ишлар министирлиқи һазир бу уйғурларниң албанийә пайтәхти тирананиң сиртидики бир мусапирлар мәркизигә орунлаштурулғанлиқини билдүрди. (Пәридә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.