Өмүр һәҗгә маңған уйғур бовайни пакистанда оғрилар пулсиз қойди


2006-08-14
Share

Аяли билән биргә өмүр һәҗгә маңған 81 яшлардики бир уйғур бовайниң 6 миң доллар пулини пакистанниң равалпинди шәһиридә дүшәнбә күни оғрилар буливелип, сәпәр үстидики бу бовайни пулсиз қойди.

Пулидин айрилған бовай оғриларниң бирини тутувалған, лекин пулини елип қачқан йәнә бир оғри қечип кәткән. Һәсәнҗан исмайил исимлик бу бовай аяли патигүл ибраһим билән биргә сәуди әрәбистанға берип өмри һәҗ қилиш үчүн буниңдин 3 күн илгири уйғур аптоном райониниң қарамай шәһиридин пакистанға кәлгән иди. У, дүшәнбә күни равалпиндики ятиқидин талаға телефон қилиш үчүн чиққанда икки адәм униң кийимигә ниҗасәт сүркиветип, әтраптики бир мәсчиткә кийимини тазилаш үчүн башлап барған вә бовай кийимини селип тазилаватқанда бу икки киши униң бәлвиғидики пулни елип қачқан. Бовай вә униң һәмраси оғриларниң бирини тутувелип сақчиға елип барған болсиму, лекин пулни алған йәнә бир оғрини туталмиди. Вәқә йүз бәргән җайдики сақчи понкитиниң бир хадими мухбиримизға оғрини сүрүштүрүватимиз, деди.

Лекин пулини булутуп қойған бовай вә униң әтрапидики уйғурлар пакистан сақчилирини бу дилоға көңүл бөлмиди, дәп әйиблимәктә. Уларниң әскәртишичә, сақчилар тутулуп қалған оғриға наһайити назакәт билән муамилә қилған. Вәқәгә мунасивәтлик кишиләр дилони пакистандики хитай әлчиханисиға мәлум қилмиған. Шу җайдики вәзийәттин хәвәрдар бир уйғур муһаҗирниң әскәртишичә, вәқәни җуңго әлчиханиға мәлум қилған тәқдирдиму буниң пайдиси йоқ икән. У," бу хил вәқәләр илгири көп қетим йүз бәрди. Биз җуңго әлчиханисиға мәлум қилған болсақму, лекин улар пәрва қилипму қоймиған иди" дәйду. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт