Йоруңқаш дәрясидики бузғунчилиқ давамлишиватиду

Хотәнниң йоруңқаш дәряси әтрапида топланған 20000‏ хитайниң қаштеши издәш үчүн тәбиәткә селиватқан зиянкәшлики дуня мәтбуатиниң диққитини давамлиқ тартмақта.

9‏- Айниң 22‏- күни америкида чиқидиған сиятил вақти гезитидә елан қилинған бир мақалидә, қаштиши тепиш үчүн йоруңқаш дәряси әтрапида муһитниң бузғунчилиққа учриши, 19‏- әсирдә америкиниң калифорния штатида, алтун издәш үчүн топланған хәзинә овчилириниң тәбиәткә салған зиянкәшликигә селиштурулған.

Марк магнир тәрипидин елан қилинған мақалидә ейтилишичә, қаштеши издәш үчүн хитайниң ичкири өлкилиридин йоруңқаш дәряси әтрапиға келип орунлишиватқан хитайларниң саниниң күнсери көпийиши вә дәряға орунлаштурулған 2000 әтрапидики чоң йәр қезиш машинисиниң кечә ‏- күндүз үзлүксиз ишләп йәрни қизип, дәряниң тәбий тәңпуңлиқини бузуши һәтта хитай мутәхәсссилириниму чүчүтүшкә башлиған. Улар, әгәр бу бузғунчилиқниң алди елинмиса, бир қанчә йилдин кейин муһим бир тәбий байлиқ һесабланған қаштешиниң пүтүнләй йоқап кетидиғанлиқини билдүрмәктә.

Мақалидә ейтилишичә, гәрчә һөкүмәт бу хәтәрниң алдини елиш үчүн бу йилниң башлирида өзи тарқатқан қаштеши издәш рухситини бикар қилип, кишиләрниң тиҗарий мәқсәт үчүн йоруңқаш дәрясида қаштеши издишини қанунсиз дәп елан қилған болсиму, әмма йәрлик уйғурлар, хитайларниң дәряға орунлаштурған йәр қезиш машинилириниң,сәһәрдә вә кәчқурун паалийитини үзлүксиз давамлаштуруватқанлиқини билдүрмәктә. (Қанат)