Йәнә үч нәпәр хитай муавин рәисликкә тәйинләнди

Уйғур елидә йәттә күндин буян давамлишиватқан уйғур аптонум районлуқ 10 - нөвәтлик хәлқ қурултийиниң 3 - омумий йиғини сәйшәнбә күни аяқлишип, төт киши аптонум районлуқ һөкүмәтниң муавин рәисликигә тәйинләнди.

Хитай хәвәр ториниң хәвиридин ашкарилинишичә, йеңидин тәйинләнгән уйғур аптонум районлуқ һөкүмәтниң муавин рәислириниң үчи хитай, бири уйғурдур. Улар, уйғур елидики хитайниң ишләпчиқириш қурулуш армийисиниң сабиқ баш қомандани җаң чиңли, санҗи областлиқ парткоминиң сабиқ секритари чйән җи, турпан вилайәтлик парткоминиң сабиқ секритари суң әйруң, уйғур аптонум районлуқ хәлқ ишлири назаритиниң сабиқ назири җаппар һәбибул икән.

Йеқинда икки нәпәр хитай муавин рәис вәзиписидин қалдурулған болуп, бу қетим иккисиниң орниға йәнә үч нәпәр хитай муавин рәиси сәпләнгән. Буниң билән хитай муавин рәислириниң сани көпәйтилгән. Мәлуматларға қариғанда, бу қетимқи толуқланған хитай муавин рәисләрниң иккиси уйғур аптонум районлуқ парткомниң секритари ваң лечүәнниң юртдиши икән.

Чәтәлдики бир қисим хитай демократлириниң ейтишичә, ваң лечүән уйғур аптонум раюнлириниң юқири һоқуқлириға көп һалларда өз юрти шәндоң өлкисидин келип чиққан хитайларни вәзипиләргә тәйинлигән болуп, бу бир қисим хитайларниң ичидиму наразилиқларни кәлтүрүп чиқарған. (Арзу)