Дилшат решит : ваң лечүәнниң икки қоли уйғур хәлқиниң қизил қини билән боялди


2008.02.18

Һазир уйғур елидә турушлуқ хитай һөкүмитиниң вәкили уйғур аптоном райониниң баш секретари ваң лечүән хоңкоң сумруғ телевизийә қанилиниң зияритини қобул қилғанда, өзиниң шәрқи түркистан террорчилириниң қәтли қилиш тизимликидики биринчи номурлуқ адәм икәнликини билдүргән.

Бүгүн дуня уйғур қурултийи баянат елан қилип ваң лечүәнниң өзини "шәрқи түркистан террорчилириниң өлтүрүш тизимликидики биринчи номурлуқ адәм" дәп елан қилғанлиқини қаттиқ әйибләйдиғанлиқини җакарлиди.

Дуня уйғур қурултийи баянатчиси дилшат ришит баянатида, ваң лечүәнниң бундақ дейишиниң әмәлийәттә "һәқиқәтни астин ‏- үстүн қилғанлиқ" икәнликини билдүрүп: " ваң лечүән уйғур елидә башлиқ болуп ишлигән 10 нәччә йилидин буян, униң һәр иккила қоли уйғур хәлқиниң қизил қини билән боялди" деди.

У йәнә ваң лечүәнниң уйғур елидә хитай һөкүмитиниң уйғурларға қаратқан дөләт террорчилиқини йүргүзүватқан мустәбит икәнликини тәкитләп: "шуңа ваң лечүән тарихниң қануний җазасиға тартилиши керәк. У бир җинайәтчи. Кишилик һоқуқ мәсилисидә у дуня кишилик һоқуқ әһдинамисигә еғир хилаплиқ қилди" деди.

Дилшат ришит йәнә: "ваң лечүәнниң туюқсиз өзиниң ‘йошурун олтуруш тизимликидики биринчи номурлуқ киши’ икәнликини оттуриға қоюши, биринчидин, бу униң уйғурлар үстидин елип барған җинайи қилмишлирини ашкарилиса, иккинчидин, у шундақ дейиш арқилиқ уйғурларниң сияси һәрикәтлирини террорчилиққа бағлаш мәқсидигә йәтмәкчи," дәйду.

Дилшат ришит ахирида, уйғур хәлқиниң һәргизму йошурун өлтүрүшкә охшаш қилмишлар билән шуғулланмайдиғанлиқини, уйғур сиясий күрәшлириниң парлақ вә ашкара һәрикәт икәнликини, уйғурларниң пәқәт сияси көрәш вә кишилик һоқуқ күриши арқилиқ өз истиқбалини бәлгиләйдиғанлиқини билдүрди. (Җүмә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.