ۋاڭ لېچۈەن يېڭى يىللىق چاي زىياپىتىدە مۇقىملىقنى تەكىتلىدى
2007.12.30
29 - دېكابىر كۈنى كەچتە ئۇيغۇر ئاپتونوم رايونلۇق سىياسىي كېڭەش چاي زىياپىتى ئۆتكۈزگەن بولۇپ، بۇنىڭغا ئۇيغۇر ئاپتونوم رايونلۇق كومپارتىيە كومىتېتى، ھۆكۈمەت، ئىشلەپچىقىرىش قۇرۇلۇش ئارمىيىسى، ئۇيغۇر ئېلىدە تۇرۇشلۇق خىتاي ئازادلىق ئارمىيىسى، سودا-سانائەتچىلەر ۋە ھەر قايسى ساھەلەرنىڭ بىر قىسىم ۋەكىللىرى ئىشتىراك قىلغان.
خىتاي كومپارتىيىسى مەركىزىي كومىتېتى سىياسىي بيۇروسىنىڭ ئەزاسى، ئاپتونوم رايونلۇق پارتكوم سېكرىتارى ۋاڭ لېچۈەن مەخسۇس تەبرىك سۆزى سۆزلەپ، ئۇيغۇر ئاپتونوم رايونىنىڭ ئۆتكەن بىر يىللىق ھەر ساھەدىكى خىزمەتلىرى ۋە ئۇتۇقلىرىغا يۇقىرى باھا بېرىش بىلەن بىرگە پارتىيە مەركىزىي كومىتېتىغا ۋاكالىتەن ھەر ساھەدىن، بولۇپمۇ ئازادلىق ئارمىيە، قوراللىق ساقچى قىسىملىرى ھەم ئىشلەپچىقىرىش قۇرۇلۇشى ئارمىيىسىدىن ئالاھىدە ھال سورايدىغانلىقى ۋە ئۇلارغا سالام يوللايدىغانلىقىنى ئىزھار قىلغان.
شىنخۇا ئاگېنتلىقىنىڭ بۇ ھەقتىكى خەۋىرىدە كۆرسىتىلىشىچە، ۋاڭ لېچۈەننىڭ سۆزىدە يەنە مىللىي ئىتتىپاقلىق ۋە مۇقىملىق مەسىلىسى ئالاھىدە ئورۇننى ئىگىلىگەن بولۇپ، ئۇ سۆزىدە " بىز مەركەزنىڭ شىنجاڭنىڭ مۇقىملىقىنى قوغداشقا ئائىت چىقارغان بىر قاتار زور سىياسەتلىرىنى تېخىمۇ چوڭقۇر ھالدا ئەمەلىيلەشتۈرۈشىمىز لازىم. بايرىقىمىز روشەن ھالدا مىللىي بۆلگۈنچىلىك ۋە قانۇنسىز دىنىي پائالىيەتلەرگە قارشى تۇرۇپ، ئىجتىمائىي ۋە سىياسىي ئامانلىقنى قەتئىي تەۋرەنمەي قوغدىشىمىز كېرەك" دەپ تەكىتلىگەن.
بۇ يىغىنغا 28 - دېكابىر كۈنى ئاپتونوم رايوننىڭ رەئىسلىك ۋەزىپىسىدىن قالدۇرىۋېتىلگەن ئىسمائىل تىلىۋالدىنىڭمۇ قاتناشقانلىقى مەلۇم. بىراق، ئۇنىڭ ھازىر ئۇيغۇر رايونىدا ھېچقانداق رەھبىرىي سالاھىيىتى يوق بولۇپ، ئۇنىڭ ئورنى قوش تىللىق مائارىپ نامى ئاستىدا ئۇيغۇر مائارىپى ۋە تىلىنى يوقىتىشنىڭ ۋە ئۇيغۇر سىياسىي ھەرىكەتلىرىگە زەربە بېرىشنىڭ بايراقدارى دەپ تەرىپلىنىپ كېلىۋاتقان 46 ياشلىق نۇر بەكرى ئىگىلىگەن ئىدى. ئىسمائىل تىلىۋالدىنىڭ ۋەزىپە ئۆتەش مۇددىتى توشماي تۇرۇپ، تۇيۇقسىز ۋەزىپىسىدىن قالدۇرىۋېتىلىشى ئۇيغۇرلار ئارىسىدا تۈرلۈك ئىنكاسلارنى قوزغىماقتا. (ئۈمىدۋار)
مۇناسىۋەتلىك ماقالىلار
- خىتاي ھۆكۈمىتى باي ناھىيىسى سەلىم يېزىسىدا ئۇيغۇرلارنى باستۇرماقتا
- ئىسمائىل تىلىۋالدى "ئۈچ خىل كۈچلەرگە زەربە بېرىش" تىكى مەيدانىنى ئاشكارىلىدى
- 6 نەپەر "شىنجاڭلىق" خىتاي فوربېس ژۇرنىلىنىڭ خىتايدىكى بايلار تىزىملىكىگە كىردى
- ۋاڭ لېچۈەن، مۇقىمسىزلىق ئۇيغۇر ئېلىدە يەنىلا جىددىي مەسىلە، دېدى
- ۋاڭ لېچۇەن تەيۋەندىكى گومىنداڭنىڭ پەخرى رەئىسى ليەنجەن بىلەن ھەمكارلىشىش ھەققىدە سۆھبەت ئۆتكۈزدى
- ۋاڭ لېچۇەن "ئامېرىكا باشلىق دۈشمەن كۈچلەر ئۇيغۇر ئېلىنىڭ مۇقىملىقىغا تەھدىت سالماقتا"دەپ كۆرسەتتى
- ۋاڭ لېچۇەن "شىنجاڭغا ياردەم بېرىش پىدائىيلار" قوشۇنىنى كۈتۈۋالدى
- خىتاي ئۆلكىلىرىدىكى چوڭ كارخانىلار ئۇيغۇر ئېلىغا ماكانلىشىپ ئىقتىسادىي ئۈستۈنلۈككە ئېرىشمەكتە
- ۋاڭ لېچۇەن" شىنجاڭدا تېررورچىلىققا قاتتىق زەربە كېرەك" دەپ قايتا تەكىتلىدى
- ۋاڭ لېچۈەن يەنە ئاتالمىش " ئۈچ خىل كۈچلەر" ھەققىدە توختالدى