Маралбеши вә йеңисар наһийисидин 12 нәпәр уйғур деһқан газдин зәһәрлинип қаза қилди

5‏- Декабир күни маралбеши наһийисиниң шамал орман мәйданидики далаға тикилгән чедир ичидә газдин зәһәрлиниш һадисиси көрүлүп, 12 киши қаза қилған, 2 киши қутқузувелинған.

Хитай ахбарат вастилириниң бу һәқтә бәргән хәвиридә, қаза қилған вә һушини йоқатқан 9 кишиниң маралбеши наһийисидин, 5 ниң йеңисар наһийисидин икәнлики, уларниң һечқандақ бир ишләпчиқириш карханилириға тәвә әмәслики, қоллирида чүчүк буя колаш рәсмийити болмиған, қанунсиз һалда қиммәт баһалиқ дора өсүмлүкини оғрилиғучилар икәнлики илгири сүрүлгән. Әмма уларниң қайси милләтликини ашкарилимиған.

Бу арида кишиләр интернет тор бәтлиридә бу һәқтә муназириләр елип берип, газдин зәһәрләнгән 12 кишиниң һәммисиниң ишсиз уйғурлардин тәшкил тапқан, турмушини қамдиялмиған намрат деһқанлар икәнликини билдүрди. Бирақ хитай ахбарат вастилири газдин зәһәрлиниш һадисисидин мәйданға кәлгән 12 адәмниң ахирәтлик ишлирини қандақ орунлаштурулғанлиқини тилға алмиди.

Мәлум болушичә, дора өсүмлүки болған чүчүк буя, уйғур илидин чәт әлләргә көп миқдарда екиспорт қилинидикән.

Уйғур елидә қиммәтлик дора өсүмлүкләрниң түри интайин көп болуп, уйғур илидин кәлгән инкасларға қариғанда, хитай өлкилиридин кәлгән аққунларниң көпинчиси, мушу хил дора өсүмлүкләр билән биллә йәнә, алтун, қаш теши қатарлиқ мәдән байлиқлирини оғрилаш арқилиқ пул тапидикән. (Әқидә)