"54-нөвәтлик дуня хәвпсизлики муһакимә йиғини" мюнхенда башланди

Ихтиярий мухбиримиз әкрәм
2018-02-16
Share
Myunhin-54-nowetlik-dunya-hewpsizlik-yighini.png Мюнхен шәһиридә башланған "54-нөвәтлик дуня хәвпсизлики йиғини" дин бир көрүнүш. 2018-Йили 16-феврал. Мюнхен, германийә.
Social Media

Германийә ахбарат васитилиридики учурлардин мәлум болушичә, йилда бир қетим өткүзүлидиған "дуня хәвпсизлики муһакимә йиғини" ниң 54-нөвәтлики германийәниң мюнхен шәһиридә 16-феврал чүш саәт 12:07 өткәндә башланған. Йиғинға йүздин артуқ дөләттин 500 дин артуқ юқири дәриҗилик дөләт рәһбәрлири, 20 дин артуқ дөләтниң президент яки алий дәриҗилик мәсуллири иштирак қилған.

Бу қетимқи йиғинниң музакирә қилидиған ғол темиси - дуня вәзийити, иқтисадий кризис, оттура шәрқтики тоқунушлар, дөләтләрниң һәрбий вә хәвпсизлик сиясәтлири қатарлиқлардин ибарәт болуп, 3 күн җәрянида 30 қетим мәхсус музакирә йиғини болидикән. 120 Қетим нутуқ сөзлинидикән. Һәрқайси әлләрдин кәлгән дөләт әрбаблири арисида 2000 қетимлиқ учришиш болуп өтидикән. Дост вә дүшмән дөләтләрниң рәһбәрлири йиғинда әркин бәс-муназирә елип баралайдикән.

Йиғин чақирилған "баварийә меһмансарийи" бу йиғин үчүн 340 еғиз ятақ, 40 йиғин зали, 950 мулазимәтчи аҗратқан. Шәһәрлик сақчи идариси болса йиғинниң бихәтәрлики үчүн 4 миң сақчи аҗратқан. "баварийә меһмансарийи" алдидики коча толуқ қамал қилинған.
Пәрәз қилинишичә, бу қетимқи йиғин җәрянида пәқәтла "шималий атлантик окян әһди тәшкилатиға қарши бирлик" намлиқ тәшкилатниң көлими чоң болмиған намайиш һәрикәтлири болуп өтидикән. Әмма намайиш йиғин мәйданидин йирақ бир җайда тинч усулда, авазсиз елип берилидикән вә йиғинға тәсир көрситәлмәйдикән.
Өткән йили германийәниң һамбург шәһиридә өткүзүлгән "алий дәриҗиликләр учришиши" йиғиниға дөләт 31 миң нәпәр бихәтәрлик күчлирини аҗратқан болсиму, йүзмиңлиған намайишчиларниң қаршилиқиға дуч кәлгән һәмдә еғир бузуп-чеқиш һадисилири йүз бәргән иди. 

Дуня уйғур қурултийиниң рәиси долқун әйса әпәнди "бу йиғин мунасивити билән уйғурлар намайиш өткүзәмду?" дегән соалимизға җаваб бәргәндә, бу йиғин мәйданиға йеқин йолиғили болмиғачқа һәмдә сақчи тәрәп намайишқа рухсәт бәрмигәнлики үчүн уйғурларниң авазини аңлитиш мумкин әмәсликини, бу сәвәбтин д у қ ниң бу йиғин мунасивити билән намайиш уюштурмиғанлиқини тилға алди.
Хәвәрләрдә әскәртилишичә, "54-нөвәтлик дуня хәвпсизлики йиғини" ни "мюнхен хәвпсизлик муһакимә йиғини җәмийити" тәшкиллигән. Бу нөвәтлик йиғинға 2 милйон явро иқтисад сәрп қилинидикән. Бу чиқимни мәзкур җәмийәт үстигә алған. Дөләт вә сода-санаәт саһәси бу чиқимниң мәлум қисмиға ярдәм қилидикән. 
Д у қ ниң муавин рәиси пәрһат муһәммиди әпәнди, "йиғин җәрянида нөвәттики уйғур елиниң вәзийити яки уйғурлар мәсилиси оттуриға қоюлуши мумкинму?" дегән соалимизға җаваб бәргәндә, йиғин хатириси давамлиқ мәхпий сақлинидиған болғач бу қетимқи йиғинда хитай дөләт вәкиллири билән елип берилған сөһбәтләрниң мәзмунини билишниң мумкин әмәсликини тилға алди. 

"мюнхен хәвпсизлик муһакимә йиғини" ни 1963-йили германийәлик нәшрият содигири евалд фон клайис билән физика алими едвард теллер тәшкиллигән. Дәсләпки нами "хәлқара дөләт мудапиә йиғини" дәп аталған. Кейин "мюнхен хәвпсизлик муһакимә йиғини" яки "дуня хәвпсизлики муһакимә йиғини" дәп өзгәртилгән. Бу йиғин һәр йили пәқәтла германийәдә өткүзүлидиған болуп, 3 күн давамлишидиған, хәлқарадики бирдин-бир дуня хәвпсизлики муһакимә йиғини болуп һесаблинидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт