Myunxénda Uyghurlar üchün alaqe bixeterliki ilmidin ders ötüldi

Gérmaniyining myunxén shehiride 24 - awghust bashlan'ghan Uyghurlar üchün alaqe bixeterliki ilmi dersi 25 - awghust axirlashti. Derske qatnashqanlar xitay hujumidin ünümlük mudapi'e körüsh we uninggha taqabil turushqa a'it bilimlerdin sawat aldi.

Melum dölettiki, xitayning Uyghurlargha qarita élip bériwatqan qol téléfun, tor alaqsige bolghan hujumliri we jasusluq heriketliridin mudapi'e körüsh hemde uninggha ünümlük taqabil turush üchün Uyghurlargha atap mexsus yumtal ishlepchiqarghan bir shirket 23 - awghust küni gérmaniyining myunxén shehirige bir neper téxnik xadimini ewetip, d u q rehberliri we bir qisim Uyghur aktiplirigha munasiwetlik ilimlerdin ders ötti. 24 - Awghust seher bashlan'ghan bu kurs 25 - awghust kech sa'et 8:00 bilen axirlashti.

Öz shirkitining salahiyiti heqqide uchur ashkarilashni ret qilghan we ziyaritimizni qobul qilishni xalimaydighanliqini bildürgen mezkur shirketning téxnik xadimining ders muqeddimiside aldin eskertishiche, bu shirket tor bixeterliki mulazimiti bilen shughullinidighan bir teshkilat bolup, ularning asasliq mulazimiti dölet halqighan chong karxanilar, hökümetsiz teshkilatlar, bésim astidiki ajiz küchlerge yardem qilishni asasliq nishan qilghan. Uyghurlarni bixeterlik bilimliri bilen terbiyilesh ötken yildin bashlap ularning asasliq programmiliri qatarigha kirgüzülgen bolup, bu qétimqi kursta mexsus Uyghurlar üchün yasalghan alaqe bixeterlikige da'ir yumtalni teqdim qilish we alaqe bixeterlikige munasiwetlik ilimlerdin ders bérishni meqset qilghan.

“Küchlük düshmenning éléktronluq razwétkisi, jasusluq pa'aliyetliri, buzghunchiliq heriketliridin mudapiyelinish we uninggha qarshi tedbir élishqa yardimi tégidu” dep qaralghan mezkur derstiki bilimler: ilghar qol téléfunliri we kompiyutérlargha xitay wiruslirigha qarshi yuqiri iqtidarliq yumtallarni qachilash, Uyghurlar keng qolliniwatqan skayp, fiyisbok qatarliq alaqe wastilirining bixeterlik iqtidarini ashurush usulliri, elxet alaqilirida xetlerni sifirlap yollash taktikisi arqiliq düshmenning uchur oghrilishidin saqlinish, kompiyutérning adréslirini yoshurush yaki düshmenni xata adris bilen teminlesh qatarliq köpligen mezmunlarni öz ichige alghan.

D u q ijra'iye komitéti re'isi dolqun eysa ependi bu munasiwet bilen ziyaritimizni qobul qilip, bu qétimqi alaqe bixeterliki kursida köpligen bilimlerdin ders alghanliqini éytti. U sözide, d u q rehberlirige qarita xitayning éléktronluq hujumlirining künséri küchiyip bériwatqanliqini, buninggha qarshi köpligen xelq'araliq organlarning Uyghurlarning alaqe mesilisige köngül bölüp kéliwatqanliqini tilgha aldi. Bu kursqa qatnashqan myunxén shehiridiki Uyghur aktipliridin osmanjan ependimu ipade bildürüp, kursta hazirghiche bilish imkaniyiti bolmighan nahayiti yaxshi téxnikilarni ögen'genlikini bayan qildi.

D u q mu'awin re'isi ümid agahi ependi bu qétimqi kurs heqqide tesiratini bildürüp, Uyghurlarning musteqilliq mesilisini qollighuchi dölet we xelq'araliq teshkilat sanining barghanséri köpiyip bériwatqanliqini, beziliri iqtisadiy jehettin qollisa, bezilirining siyasiy jehettin terbiyilewatqanliqini, yene bezilirining bolsa téxnikilik bilimler jehette yardemde boluwatqanliqini tilgha aldi.