Алматада уйғур елида қурбан болғанлар хатириләнди

Ихтиярий мухбиримиз ойған
2014.06.13
almata-10-iyun-paaliyitidin-korunush-sozde-qehriman-ghojamberdi.jpg 10 - Июнда алматадики паалийәттә қәһриман ғоҗамбәрди сөз үстидә
RFA/Oyghan


10 - Июнда алмата һәм униң әтрапидики уйғурлар бир йәргә җәм болуп хатирә мурасими өткүзди. Бу паалийәт уйғур елида кейинки вақитларда йүз бәргән қанлиқ вәқәләр һәм хитай даирилири тәрипидин йүргүзүлгән бастуруш вә җазалаш һәрикәтлири нәтиҗисидә қурбан болғанларға беғишланди.

Алди билән уларға атап қуран оқулғандин кейин сиясәтшунас қәһриман ғоҗамбәрди уйғур диярида йүз бериватқан паҗиәләр һәм уларниң келип - чиқиш сәвәблири, дуня уйғур қурултийи вә пүткүл дуня уйғурлириниң, хәлқара инсан һәқлирини қоғдаш тәшкилатлири һәмдә бәзи мәмликәтләр аммивий ахбарат васитилириниң бу һәқтики инкаслири һәққидә тәпсилий тохталди. У шундақла рабийә қадир рәһбәрликидики дуня уйғур қурултийиниң уйғурларниң инсаний һоқуқлирини қоғдаш йөнилишидә елип бериватқан паалийәтлири, рабийә қадирниң уйғур миллий һәрикитидики орни һәмдә өзиниң йеқинда рабийә қадирниң тәклипи билән америка қошма штатлириға қилған сәпири һәққидә мәлумат бәрди. Қ. Ғоҗамбәрди қазақистан уйғурлириниң бүгүнки күндики вәзипилири һәққидә тохтилип, миллий маарипни сақлап қелиш вә мәмликәттики мәвҗут шараитлардин толуқ пайдиланған һалда, маарип арқилиқ миллий кимликни сақлап қелишниң баш вәзипә болуп қеливатқанлиқини илгири сүрди.

Радиомиз зияритини қобул қилған шаир малик садироф мәзкур мурасим һәққидә мундақ деди: “мән бүгүнки йиғиндин үч хуласә чиқардим: биринчиси, қәһриман ғоҗамбәрди тоғрилиқ, иккинчиси, вәтәндики зулумлар, хитай һакимийитиниң зомигәрлики тоғрилиқ, үчинчиси, миллий лидеримиз вә анимиз рабийә қадирниң кимлики тоғрилиқ.”

Сөзгә чиққан “җелтоқсан” һәрикитиниң лидери хасен қоҗахмет түркий тиллиқ хәлқләрниң бирликини, иттипақлиқини илгири сүрүп, келәчәктә бирлишип һәрикәт қилишқа чақирди. Филологийә пәнлириниң намзатлири рабик исмайилоф вә дилинур қасимова, дуня уйғур аяллири бирлики рәисиниң оттура асиядики орунбасари асийәм турдийева һәм униң әзаси хәйринса мәсимовалар болса, уйғур елида зулум чекиватқан қериндашлириға өзлириниң һесдашлиқини билдүрди һәмдә болупму рабийә қадирниң уйғурларниң миллий мустәқиллиқи вә әркинлики йолида елип бериватқан ишлирини һәртәрәплимә қоллиди. Улар рабийә қадирниң уйғурларниң бирдин - бир миллий лидери екәнликини, дуня уйғур қурултийиниң уйғурларниң кишилик һоқуқини қоғдайдиған хәлқарада тонулған тәшкилат икәнликини оттуриға қойди.

М. Садироф рабийә қадир һәққидә мундақ деди: “рабийә қадир өзиниң пүткүл һаятини уйғурларниң әркинлики, мустәқиллиқи үчүн беғишлиған аял. Мән рабийә қадир тоғрилиқ "азадлиқ җәңчиси яки әждиһаға санчилған нәйзә" дәп дастан яздим. Бу китабта рабийә қадир вә уйғурниң йеқинқи заман тарихи әкс етилиду.”

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.