Алматада уйғур мәшрәплири ара мусабиқә болуп өтти

Ихтиярий мухбиримиз ойған
2017-03-24
Share
almata-meshrep-musabiqisi-2017.jpg Алмата шәһридики мәшрәпләр ара мусабиқә
RFA/Oyghan


23-Март күни алмата шәһириниң достлуқ мәһәллисигә орунлашқан "достлуқ" кафеханисида алмата шәһәрлик уйғур йигит башлири бирләшмиси йенидики "алмата мәшрипи"ниң уюштуруши билән мәшрәпләр ара мусабиқә болуп өтти. Мәзкур паалийәтни алмата шәһири әвезоф намидики уйғур етно-мәдәнийәт мәркизи, "пәрваз" иҗрачилар бирләшмиси қоллап-қувәтлиди.

Алди билән йиғин риясәтчиси әкбәрҗан исмайилҗаноф уйғур мәшрипи һәққидә доклат қилди. У өз сөзидә, уйғур мәшрипиниң бирләшкән дөләтләр тәшкилати маддий мәдәнийәт мираси тизимликигә киргәнликини, мәшрәпниң келип чиқиш тарихи һәм униң әһмийитини алаһидә тәкитләп, мундақ деди: "мәктәп инсан балисиниң билимини йорутса, мәшрәп әдәб-әхлаққа, рәсим-қаидилик болушқа дәвәт қилиду. Бүгүнки күнлүктә бу уюштурулған мәшрәпниң асасий мәниси мусабиқини өткүзгәч, бир-биригә болған достлуқ меһрини күчәйтип, инақлиқни техиму чиңитиш болуп һесаблиниду."

Риясәтчи мурасим башлиништин бурун қазилар һалқисини вә мусабиқә қатнашқучилирини, шундақла мусабиқә қаидилирини тонуштурди.

Мусабиқигә алмата шәһириниң һәр қайси наһийилиридин "қалқаман оттуз оғул мәшрипи", "алатав оттуз оғли", "бостан мәшрипи", "султанқорған оттуз оғул мәшрипи", "деһқан оттуз оғли", "достлуқ оттуз оғул мәшрипи" вә алмата вилайитиниң "челәк оттуз оғул мәшрипи" болуп йәттә мәшрәп әһли қатнашти. Мусабиқә төрт бөлүм, йәни саламлишиш, бәгләр мусабиқиси, оттуз оғул мусабиқиси, дава-дәстүр бойичә өтти. Мусабиқә давамида униң қатнашқучилири мәшрәп тарихи, униң қаидилири, түзүлүши, әһмийити бойичә түзүлгән соалларға җаваб бәрди. Улар шундақла айрим мәшрәп көрүнүшлири бойичиму өз һөнәрлирини көрсәтти.

Радийомиз зияритини қобул қилған атақлиқ шаир аблиз һезим мәшрәпниң түп мәқсити һәм тәрбийивий әһмийитини билишниң зөрүр икәнликини, бурунқи мәшрәпләрниң әнә шу мәшрәптинла башланмай, бәлки униң сиртидин башланғанлиқини илгири сүрүп, мундақ деди: "мәшрәп, мәшрәп вақтидики паалийити вә мәшрәп сиртидики паалийити дәп иккигә бөлүнгән. Шу вақитниң бәглири мәшрәп әзалирини шу юртни башқуридиған адәмлиридин яхши башқурған иди. Мәшрәп әһлини башқуридиған адәм һәммә җәһәттин йетилгән болуши керәк."
Алмата шәһридики мәшрәпләр ара мусабиқә паалийтиниң баһалиғучилири
А. Һезимниң пикричә, өз вақтида уйғурларниң ата-бовилири қаидә-йосунни билмәйдиған, әдәб-әхлақсиз балиларни мәшрәп көрмигән, дәп қаттиқ тәнқид қилған. У, бүгүнки мусабиқиниң әнә шу мәшрәп қаидилирини тәрғиб қилиш мәқситидә уюштурулғанлиқини, шуниң үчүн мундақ паалийәтләрни пат-патла өткүзүп турушниң интайин муһим икәнликини оттуриға қойди.

Мурасим давамида сөзгә чиққан әдәбиятшунас алим рабик исмайилоф, "уйғур авази" гезитиниң баш муһәррири йершат әсмәтоф, пешқәдәм журналист ядикар сабитоф, "туран дуняси" җәмийәтлик фондиниң мудири карлин мәхпироф вә башқилар мәзкур мусабиқиниң әһмийити вә бәзи кәмчиликлири һәққидә өз пикирлирини билдүрүп, уни уюштурғучиларға миннәтдарлиқини изһар қилди.

Пешқәдәм сәнәткар садиқҗан юнусофниң қаришичә, мундақ мусабиқә пүткүл уйғур җәмийитидә тунҗи қетим өткүзүлүватқан болуп, униң кәмчиликләрдин көрә әһмийити интайин зордур. У мундақ деди: "сәвәби, бизниң, болупму тарихий вәтинимиздин башқа оттура асияда, атап ейтқанда, алматада мундақ ишларни өткүзүп туруш наһайити муһим. Бу мәшрәпләр асасән охшисиму, бәзидә охшимайдиған йәрлири бар. Биз бүгүн омумий бир келишимгә кәлдуқ десәк болиду. Барлиқи яхши тәйярлинип кәпту."

С. юнусоф мусабиқә арқилиқ мәшрәп әһлиниң қандақ болуш лазимлиқи, бәг, пашшап вә башқиларниң вәзипилири, мәшрәп әзалириниң өзини тутуш, чоң вә кичикләргә қандақ муамилидә болуш һәққидә яшларниң яхши билим алғанлиқини алаһидә тәкитлиди. Униң пикричә, мушундақ паалийәтләрниң пат-пат өткүзүлүп туруши яшларниң миллий өрп-адәтләргә болған һөрмитини, муһәббитини ойғатса, мәшрәп әзалириниң саватлиқ болушини тәминләйду.

Мурасимниң иккинчи қисмида алдинқи үч орунға еришкән "достлуқ оттуз оғул мәшрипи"-үлгилик, "алатав оттуз оғли"-қаидә-йосунлуқ, "челәк оттуз оғул мәшрипи"-хушхой дегән мәхсус пәхрий ярлиқлар билән тәқдирләнди. Қалған мәшрәп әһлилири иккинчи дәриҗилик пәхрий ярлиқлар вә башқилар билән мукапатланди. Мусабиқә давамида "дияр" ансамбилиниң орунлишида миллий саз-нәғмиләр, күлкә маһирлириниң хушчақчақлири тамашибинлар диққитигә һавалә қилинди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт