Almatada Uyghur meshrepliri ara musabiqe bolup ötti

23-Mart küni almata shehirining dostluq mehellisige orunlashqan “Dostluq” kaféxanisida almata sheherlik Uyghur yigit bashliri birleshmisi yénidiki “Almata meshripi”ning uyushturushi bilen meshrepler ara musabiqe bolup ötti. Mezkur pa'aliyetni almata shehiri ewézof namidiki Uyghur étno-medeniyet merkizi, “Perwaz” ijrachilar birleshmisi qollap-quwetlidi.

Aldi bilen yighin riyasetchisi ekberjan ismayiljanof Uyghur meshripi heqqide doklat qildi. U öz sözide, Uyghur meshripining birleshken döletler teshkilati maddiy medeniyet mirasi tizimlikige kirgenlikini, meshrepning kélip chiqish tarixi hem uning ehmiyitini alahide tekitlep, mundaq dédi: “Mektep insan balisining bilimini yorutsa, meshrep edeb-exlaqqa, resim-qa'idilik bolushqa dewet qilidu. Bügünki künlükte bu uyushturulghan meshrepning asasiy menisi musabiqini ötküzgech, bir-birige bolghan dostluq méhrini kücheytip, inaqliqni téximu chingitish bolup hésablinidu.”

Riyasetchi murasim bashlinishtin burun qazilar halqisini we musabiqe qatnashquchilirini, shundaqla musabiqe qa'idilirini tonushturdi.

Musabiqige almata shehirining her qaysi nahiyiliridin “Qalqaman ottuz oghul meshripi”, “Alataw ottuz oghli”, “Bostan meshripi”, “Sultanqorghan ottuz oghul meshripi”, “Déhqan ottuz oghli”, “Dostluq ottuz oghul meshripi” we almata wilayitining “Chélek ottuz oghul meshripi” bolup yette meshrep ehli qatnashti. Musabiqe tört bölüm, yeni salamlishish, begler musabiqisi, ottuz oghul musabiqisi, dawa-destür boyiche ötti. Musabiqe dawamida uning qatnashquchiliri meshrep tarixi, uning qa'idiliri, tüzülüshi, ehmiyiti boyiche tüzülgen so'allargha jawab berdi. Ular shundaqla ayrim meshrep körünüshliri boyichimu öz hönerlirini körsetti.

Radiyomiz ziyaritini qobul qilghan ataqliq sha'ir abliz hézim meshrepning tüp meqsiti hem terbiyiwiy ehmiyitini bilishning zörür ikenlikini, burunqi meshreplerning ene shu meshreptinla bashlanmay, belki uning sirtidin bashlan'ghanliqini ilgiri sürüp, mundaq dédi: “Meshrep, meshrep waqtidiki pa'aliyiti we meshrep sirtidiki pa'aliyiti dep ikkige bölün'gen. Shu waqitning begliri meshrep ezalirini shu yurtni bashquridighan ademliridin yaxshi bashqurghan idi. Meshrep ehlini bashquridighan adem hemme jehettin yétilgen bolushi kérek.”

A. Hézimning pikriche, öz waqtida Uyghurlarning ata-bowiliri qa'ide-yosunni bilmeydighan, edeb-exlaqsiz balilarni meshrep körmigen, dep qattiq tenqid qilghan. U, bügünki musabiqining ene shu meshrep qa'idilirini terghib qilish meqsitide uyushturulghanliqini, shuning üchün mundaq pa'aliyetlerni pat-patla ötküzüp turushning intayin muhim ikenlikini otturigha qoydi.

Murasim dawamida sözge chiqqan edebiyatshunas alim rabik ismayilof, “Uyghur awazi” gézitining bash muherriri yérshat esmetof, péshqedem zhurnalist yadikar sabitof, “Turan dunyasi” jemiyetlik fondining mudiri karlin mexpirof we bashqilar mezkur musabiqining ehmiyiti we bezi kemchilikliri heqqide öz pikirlirini bildürüp, uni uyushturghuchilargha minnetdarliqini izhar qildi.

Péshqedem sen'etkar sadiqjan yunusofning qarishiche, mundaq musabiqe pütkül Uyghur jem'iyitide tunji qétim ötküzülüwatqan bolup, uning kemchiliklerdin köre ehmiyiti intayin zordur. U mundaq dédi: “Sewebi, bizning, bolupmu tarixiy wetinimizdin bashqa ottura asiyada, atap éytqanda, almatada mundaq ishlarni ötküzüp turush nahayiti muhim. Bu meshrepler asasen oxshisimu, bezide oxshimaydighan yerliri bar. Biz bügün omumiy bir kélishimge kelduq dések bolidu. Barliqi yaxshi teyyarlinip keptu.”

S. Yunusof musabiqe arqiliq meshrep ehlining qandaq bolush lazimliqi, beg, pashshap we bashqilarning wezipiliri, meshrep ezalirining özini tutush, chong we kichiklerge qandaq mu'amilide bolush heqqide yashlarning yaxshi bilim alghanliqini alahide tekitlidi. Uning pikriche, mushundaq pa'aliyetlerning pat-pat ötküzülüp turushi yashlarning milliy örp-adetlerge bolghan hörmitini, muhebbitini oyghatsa, meshrep ezalirining sawatliq bolushini teminleydu.

Murasimning ikkinchi qismida aldinqi üch orun'gha érishken “Dostluq ottuz oghul meshripi”-ülgilik, “Alataw ottuz oghli”-qa'ide-yosunluq, “Chélek ottuz oghul meshripi”-xushxoy dégen mexsus pexriy yarliqlar bilen teqdirlendi. Qalghan meshrep ehliliri ikkinchi derijilik pexriy yarliqlar we bashqilar bilen mukapatlandi. Musabiqe dawamida “Diyar” ansambilining orunlishida milliy saz-neghmiler, külke mahirlirining xushchaqchaqliri tamashibinlar diqqitige hawale qilindi.