Америка муавин президенти күрт парламент әзалири билән юмилақ үстәл йиғини чақирди

Ихтиярий мухбиримиз әркин тарим
2016-01-22
Share
jo-baydin-Joe-Biden-turkiye.jpg Америка муавин президенти җо байдин түркийә зияритидә, партлаш йүз бәргән султан әхмәт райониға берип тәзийә билдүрди. 2016-Йили 22-январ, истанбул.
AFP

Америка қошма штатлириниң муавин президенти җов байдин рәсмий зиярәт үчүн түркийәгә йетип кәлди. 23-январ күни түркийә дөләт рәиси рәҗәп таййип әрдоған вә баш министир әһмәт давутоғлу қатарлиқ рәһбәрләр билән учрашмақчи болған җов байдин бүгүн күрт мәсилиси тоғрисида юмилақ үстәл йиғиниға қатнашти.

Җов байдинниң түркийәдики бүгүнки паалийәтлириниң һәммиси күрт мәсилиси тоғрисида болуп, бүгүн чақирған юмилақ үстәл йиғиниға адаләт вә тәрәққият партийәсиниң күрт парламент әзалиридин ғалип әнсәроғлу, орхан мироғлу, җумһурийәт хәлқ партийәсидин күрт милләт вәкили сәзгин танриқулу билән фикри сағлар әпәнди, күрт партийәси болған хәлқниң демократийәси партийәси парламент әзаси айхан билгән билән ләйла зана ханим қатнашти.

Бүгүн чүштин бурун истанбул бешикташ районидики конрад меһманханисида мухбирларға йепиқ өткүзүлгән бу юмилақ үстәл йиғинида нуқтилиқ һалда күрт мәсилиси тоғрисида музакирә елип берилған.

Юмилақ үстәл йиғини ахирлашқандин кейин америка қошма штатлириниң муавин президенти җов байдин түркийәдики нопузлуқ аммиви тәшкилатларниң мәсуллири билән йиғин өткүзгән болуп, мәзкур йиғиндиму түркийәниң күрт мәсилиси тоғрисида музакирә елип берилған.

Түрк ахбарат васитилиридики хәвәрләргә асасланғанда, 23-январ күни җов байдин түркийә дөләт рәиси рәҗәп таййп әрдоған, баш министир әһмәт давутоғлу билән учришидиған болуп, бу учришиштиму күрт мәсилиси,"п к к" террор мәсилиси, сүрийә, ирақ вә дәмәшқ ирақ ислам дөлити террор мәсилиси қатарлиқ мәсилиләр музакирә қилинидикән.

Америка қошма штатлириниң муавин президенти җов байдинниң түркийәниң вә оттура шәрқ дөләтлириниң вәзийити бундақ җиддий бир әһвалда түркийәгә зиярәт елип бериштики мәқсити немә? америка билән түркийә бу учришишларда райондики мурәккәп вәзийәт һәққидә һәм пикир болаларму? дегәнгә охшаш соалларға җаваб тепиш үчүн әнқәрә ғази университети оқутқучиси профессор доктор мәмәт акиф оқур әпәнди вә тәтқиқатчи журналист һамут көктүрк әпәндиләр билән телефон сөһбити елип бардуқ.

Профессорр доктор мәмәт оқур әпәнди җобайдинниң түркийәгә зиярәт елип бериштики мәқсити һәққидә тохтилип мундақ деди: "һазир сүрийәдә башлинип, түркийәдә улғийип кәткән п к к террор мәсилисиниң күн тәртиптә болидиғанлиқи ениқтәк қилиду. Америка қошма штатлири түркийәниң п к к террор тәшкилати билән мунасивити бар болған сүрийәниң шималидики ‹п й д' тәшкилати билән алақә қурушини арзу қилиду. Түркийә болса барғансери көпийиватқан террор һуҗумини көрситип туруп, п й д билән алақә қурушни қобул қилмайду. Бу сәвәбтин көпрәк күрт мәсилиси, бу мәсилиниң сүрийәгә узириши, п к к террор мәсилиси тоғрисида музакирә елип бериливатқанлиқини көрүвалалаймиз."

У, америка қошма штатлири билән түркийә оттурисидики музакиридә бәзи мәсилиләрдә асанлиқчә пикир бирликигә келәлмәйдиғанлиқини баян қилип мундақ деди: "бәзи мәсилиләрдә асанла һәм пикир болалмайду дәп ойлаймән, чүнки түркийә террорниң шиддитини йеқиндин һес қиливатиду. Түркийә сүрийәдики ‹п й д' ниң түркийәдики ‹п к к' билән мунасивити барлиқини билиду. Шуңа түркийә америка қошма штатлириниң бу һәқтики тәләплирини асанлиқ билән қобул қилмайду дәп ойлаймән. Америка қошма штатлири дәмәшқ ирақ ислам дөлити террорчилириға қарши күрәштә сүрийәдики күртләр қурған ‹п й д' тәшкилатини қоллайду. Шуңа бу мәсилә тоғрисида музакирә елип бериши мумкин дәп ойлаймән. Бу йәрдики ачқучлуқ мәсилә, сүрийәниң шималидики п й д тәшкилатини түркийә қануни тәшкилат дәп қобул қилса, п к к тәшкилати билән бирликтә түркийәгә еғир хәвп елип келиду."

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт