Amérika Uyghur jama'iti merhum muhemmed salih hajim üchün du'a-tilawet qildi

Muxbirimiz eziz
2018.02.03
Amerikida-Muhemmet-Salih-Hajim-Uchun-Tilawet1.jpg Amérika Uyghur jama'iti merhum muhemmed salih hajim üchün du'a-tilawet qildi. 2018-Yili 2-féwral. Fals church, amérika.
RFA/Eziz

Yéqinda Uyghurlarning eng mötiwer diniy alimliridin muhemmed salih hajimning ürümchidiki “Terbiyilesh merkezliri” ning biride 82 yéshida jan üzgenliki heqqidiki xewerler tarqalghandin kéyin, dunyaning herqaysi jayliridiki Uyghur jama'iti merhumgha öz teziyelirini bildürdi. Bezi jaylarda merhumgha atap ghayibane jinaza namizi oqulghan bolsa yene bezi jaylarda merhumgha atap xetme-qur'an ötküzüldi. Shu qatarda amérikidiki Uyghur jama'iti 2-féwral kechqurun washin'gton shehirige anche yiraq bolmighan fals church shehiridiki bir méhmanxana zaligha toplinip, merhum muhemmed salih hajim üchün du'a-tilawet ötküzdi.

Kech sa'et altidin bashlap yighilishqa bashlighan jama'et zalgha jayliship bolghandin kéyin, birlikte ghizalandi. Andin amérika Uyghur birleshmisining re'isi ilshat hesen söz élip muhemmed salih hajimning hayati we ish-izliri heqqide qisqiche melumat berdi. Shundaqla merhumning dostliridin biri, dunya Uyghur qurultiyining aliy rehbiri rabiye qadir xanimni merhum heqqide söz qilip bérishke teklip qildi.

Teklipke bina'en söz alghan rabiye qadir xanim özining eyni yilliri merhum bilen bille xizmet qilghan waqitlirini eslep, muhemmed salih hajimning Uyghur xelqi bilen xitay hökümiti otturisida köwrüklük rolini oynighan bir shexs ikenlikini tilgha aldi. 

Shuningdin kéyin amérikidiki Uyghur jama'iti ichide tonulghan diniy ölimalardin nurdun hajim söz aldi. U sözide, xitay hökümitige qarshi herikette bolmighan we yashinip qalghan bir diniy alimningmu xitay hökümitining yighiwélish ornida jan üzgenlikidin sawaq élip, düshmenni éniq tonuwélishning muhimliqini tekitlidi. 

Arqidin u merhum muhemmed salih hajimgha atap qira'et qildi. Qira'ettin kéyin nurdun hajim bashliq jama'et birlikte du'agha qol kötürdi.

Du'adin kéyin nurdun hajim bügünki pa'aliyetke qatnashqanlar we her xil seweblerdin kélelmigenlerni 1997-yilidiki “5-Féwral paji'esi” ning 21 yilliqi munasiwiti bilen washin'gton shehiridiki xitay elchixanisi aldida ötküzülidighan namayishqa qatniship bérishke chaqirdi. Shuningdek buning muhajirettiki her bir Uyghurning mejburiyiti ikenlikini tekitlidi.

Ilshat hesenmu bu heqte söz qilip, amérikidiki Uyghurlarni mumkin bolsa bu namayish pa'aliyetliridin bashqa15-mart küni nyuyork shehiride ötküzülidighan chong namayishqimu qatnishishqa chaqirdi. 

Pa'aliyet axirida bu qétimqi yighilishqa ishtirak qilghan dunya Uyghur qurultiyining re'isi dolqun eysa ziyaritimizni qobul qildi. U muhemmed salih hajimning wapatigha öz qayghusini ipadilesh bilen birge, bir türküm ilim ehlining 1980-yilliri etiwarlinip muhim orunlargha qoyulushining emeliyette xitay hökümitining köz boyamchiliqi ikenlikini körsetti.

Ilshat hesenmu ayrim ziyaritimizni qobul qilghanda gerche hazir Uyghurlarning xitay hökümiti yolgha qoyuwatqan basturush siyasetlirige qarshi kötürülüsh imkani bolmisimu, héchbolmighanda Uyghurlarning buninggha bolghan ghezipini, shuningdek özlirining héchqachan bash egmeydighan jasaritini ipadilesh mejburiyiti barliqini tekitlidi.

Melum bolushiche, bu qétimqi pa'aliyetni amérika Uyghur birleshmisi we xelq'ara Uyghur kishilik hoquq we démokratiye fondi jem'iyiti birliship uyushturghan bolup, muhajirettiki Uyghurlarning hemkarliq we hemdertlik rohi yene bir qétim janliq namayan qilindi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.