Ана-бала муһаҗир дохтур: “хәйр-сахавәтчи издәветип хәйр сахавәтчигә айлинип қалдуқ”

Мухбиримиз шөһрәт һошур
2017.12.12
Ana-Bala-Uyghur-Doxtur-Setiralar-Somaliada-2.jpg Ана-бала уйғур дохтур-сестралар сомалида.
RFA/Shohret Hoshur

Сомалида 3 ай инсанпәрвәрлик ярдими билән мәшғул болған уйғур ана-бала дохтур бүгүнки программимизда, өзлириниң хәйр-сахавәткә еһтияҗлиқ туруқлуқ қандақларчә хәйр-сахавәтчи болуп қалғанлиқи вә сомалидики 3 айлиқ һаятида ай юлтуз көкбайрақ йәни шәрқи түркистан байриқини немә үчүн қолидин чүшүрмигәнлики һәққидә пикир вә тәсират баян қилди.

Һазирға қәдәр ашкариланған ахбарат учурлиридин мәлум болушичә, уйғур муһаҗирлириниң сани вә түри қанчә күп болушидин қәтийнәзәр, уларниң зулумдин қечип чиққанлиқи вә ярдәмгә еһтияҗи барлиқи ортақ нуқта болмақта. Шуңа биз сомалиға инсанпәрвәрлик ярдими үчүн барған вә у йәрдә 3 ай хизмәт қилған уйғур ана-бала дохтурдин, уларниң сомалий сәпириниң сәвәби һәққидә йәнә илгириләп мәлумат соридуқ.

Арзугүл ханим, өзлириниң хәйр-сахавәтчи издәветип хәйр-сахавәтчигә айлинип қалғанлиқидәк бир реаллиқни йошурмиди. Униң дейишичә, улар әрзан өй издәп измирниң қушадасиға кәткән, у йәрдики вақтида истанбулниң бәйликдүз дегән йеридә бикарлиқ бир өй барлиқини аңлап, истанбулға йенип кәлгән вә хәйр-сахавәт үчүн айрилған мәзкур өйдә бир мәһәл турған. Әмма иш издәш, иш тепиш вә ишләштин ибарәт һаятниң техиму җиддий еһтияҗлириға, бәйликдүздики бу бикарлиқ өйдә туруп җаваб тапқили болмайдиған болғачқа, бу өйни игисигә яндуруветиш койиға чүшкән. Өй игиси өзлириниң сомалида хәйр-сахавәт билән шуғуллиниватқанлиқи вә халиса уларниңму халисанә хизмәт қилишқа еһтияҗ барлиқини билдүргән. Нәдә туруш, нәдә ишләш койида баш қатуруватқан бу уйғур ана-бала, бу яшаш вә өзи үчүн хизмәт қилиштин ибарәт бу пурсәткә чиң йепишқан.

Адәттә уйғурлар җамаәт сорунлирида өз қийинчилиқи һәққидә еғиз ечишни, болупму тирикчилик җәһәттә яман күндә қалғанлиқи һәққидә сөз қилишни халимайду; әмма сөһбитимиздин мәлум болушичә, бу ана-бала дохтур ундақ әмәс; чүнки булар өзлириниң яшаш иқтидариға йүздә-йүз ишиниду; бешиға кәлгән пүтүн палакәтчиликниң сәвәбини, адаләтсизлик, дөләтсизлик, асарәт дәп қарайду. Шуңа улар сомалида яшиған 3 ай давамида ай-юлтузлуқ көк байрақни бир күнму қолидин чүшүрмигән.

Буниң сәвәбини уларни мундақ чүшәндүриду: “бешимизға кәлгән оңушсизлиқниң түп сәвәби дөләтсизлик-байрақсизлиқ икәнликини бурундинла билимиз, әмма у байрақни көтүрүш пурсити һаятимизниң һазирғичә қисмида асасән мумкин болмай кәлди, шуңа бошлуқларни толдурайли дәйду”.

Юқирида, сомалида 3 ай хәйр-сахавәт ишлири билән шуғулланған ана- бала муһаҗир дохтурниң хәйр-сахавәт ишлири давамида қолидин ай-юлтузлуқ көкбайрақниң чүшмигәнлики һәққидә мәлумат бәрдуқ.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.