Анатолийәдики үч шәһәрдә уйғурларни қоллаш намайиши өткүзүлди

Мухбиримиз әркин тарим
2014.08.18
turkiye-qiriqqele-namayish-1.jpg Анатолийәниң қириққәлә шәһридики намайиштин бир көрүнүш
RFA/Erkin Tarim


Йеқиндин буян болуп, 28 - июл йәкән вәқәсидин кейин түркийәниң һәрқайси вилайәт, шәһәр вә наһийәлиридә хитайға қарши наразилиқ билдүрүш, уйғурларға һесдашлиқ билдүрүш паалийәтлири қанат яймақта.

8 - Айниң 15 - күни түркийәниң қириққалә, сивас вә токат қатарлиқ үч чоң вилайитиниң мәркәз шәһәрлиридә бирла вақитта хитайниң уйғурларға елип бериватқан бесим сияситигә наразилиқ вә уйғурларға һесдашлиқ билдүрүш паалийәтлири өткүзүлди. Бу паалийәтләр бу шәһәрләрниң әң муһим коча вә мәйданлирида өткүзүлгән болуп, бу паалийәткә көп санда аммиви тәшкилат, сиясий партийә вә амма қатнашмақта.

8 - Айниң 15 - күни түркийәниң әң чоң вилайәтлиридин бири болған сивас вилайитиниң мәркизи сивас шәһиридиму хитайға қарши наразилиқ намайиши өткүзүлди. Түркийә кадирлар уюшмиси, түркийә мәзлумлар тәшкилати қатарлиқ 58 аммиви тәшкилатниң вәкиллири қатнашқан бу намайиш мәвланә кочисида өткүзүлгән болуп, намайишқа 500 әтрапида киши қатнашқан.

www.haberler.com Тор бетидә елан қилинған хәвәргә асасланғанда, намайишта мәтбуат баянатини оқуп өткән түркийә кадирлар уюшмиси сивас шөбиси мәсули муһаммәт алий гәнч әпәнди дуняниң нурғун җайлирида мусулманларға қарита қирғинчилиқ елип бериливатқанлиқини, дуня дөләтлирини буни дәрһал тохтитишқа чақиридиғанлиқини, болупму түркийә һөкүмитини қериндаш уйғур хәлқигә игә чиқишқа чақиридиғанлиқини баян қилинған.

Уйғурлар тоғрисида елип берилған үчинчи чоң паалийәт 8 - айниң 15 - күни түркийәниң токат вилайитидә өткүзүлгән. Токат оқутқучилар уюшмиси шәрқий түркистан вә пәләстиндики мусулманларға ярдәм йиғиш үчүн өткүзгән бу паалийәт токат шәһириниң мәркизигә җайлашқан җумһурийәт мәйданида өткүзүлгән. Бу паалийәт тоғрисида мухбирларға баянат бәргән оқутқучилар уюшмиси мәсули сибәл йәткин ханим, бүгүн ғаззә вә шәрқий түркистандики мусулманларға ярдәм йиғиш паалийити башлатқанлиқини баян қилип өткән. У баянатида түрк хәлқини уйғурларға иқтисадий җәһәттин ярдәм қилишқа чақирған.

Булардин башқа түркийәдә паалийәт елип бериватқан сиясий партийә, аммиви тәшкилат вә мәшһур затлар иҗтимаий таратқуларда баянат елан қилип, хитайниң уйғурларға елип бериватқан бесим сияситини әйиблимәктә. Түрк хәлқи вә түрк һөкүмитини уйғурларға ярдәм қилишқа чақирмақта. Мутәхәссисләр бу хил паалийәтләрниң түркийә бойичә қанат йейишиниң түркийә һөкүмитини уйғур мәсилисигә техиму көп көңүл бөлүшкә мәҗбурлайдиғанлиқини илгири сүрмәктә

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.