Mélborndiki amérika bash konsuli awstiraliye sherqiy türksitan jem'iyitini ziyaret qildi

6-Mart charshenbe küni amérikining mélborun shehiride turushluq bash konsuli maykol klayné )Michael kleine( bashchiliqidiki 2 kishilik hey'et adélayd shehiridiki awistiraliye sherqiy türksitan jem'iyitini ziyaret qilghan.

Amérika konsuli maykul klayné bashchiliqidiki bu hey'etni nurmuhemmed türkistani, mustapa turan qatarliq awstiraliye sherqiy türksitan jem'iyitining mes'ulliri we péshqedem jama'et erbabiy exmet igemberdi qatarliqlar qizghin kütüwalghan. Igilishimizche, bu uchrishishta Uyghurning hazirqi weziyiti toghrisida söhbet élip bérilghan we Uyghurlargha alaqidar telep we doklatlar sunulghan.

Biz bu uchrishish toghrisida toluq melumatqa ige bolush üchün awstiraliye sherqiy türkistan jem'iyitining re'isi nurmuhemmed türkistani bash katipi mustapa turan, adélaydta yashawatqan péshqedem zatlardin exmet igemberdi ependiler bilen söhbet élip barduq.

Exmet igemberdi ependi amérika konsulining adélaydttiki Uyghurlar bilen uchrishish tarixiy ehmiyetlik bir ish boldi, dédi. U mundaq dédi: “Wetinimizdiki éghir weziyetler we xitay hökümitining wetinimizde qiliwatqan zorawanliqlirigha qarshi amérika rehberlikidiki gherb elliri jiddiy inkaslarni bildürdi. Bizning ehwalimizni bilish üchün mélborun shehiridin kelgen amérika qoshma shtatlirining mélborundiki bash konsuli maykol klayné bashchiliqidiki bir hey'et bilen uchrashtuq. Men oylaymen, bu bir tarixiy ehmiyetke ige uchrishish boldi.”

Nurmuhemmed türkistanining bildürüshiche, amérikaning mélborunda turushluq bash konsuli maykol klayné ependi ulardin Uyghur diyarida yüz bériwatqan weqelerning delil ispati toghruluq matériyallarni telep qilghan. Bash konsul yene ulardin xitayning awstiraliyede yashawatqan Uyghurlargha parakendichilik salghan ehwallarning bar-yoqluqini sorighan we shundaqla awstiraliye hökümitining Uyghur mesilisige qaysiy derijide köngül bölüwatqanliqini sorighan.

Nurmuhemmed türkistani bu uchrishishta bash konsulgha Uyghurlarning nöwettiki weziyiti toghrisida chüshenche bergenlikini, Uyghurlar toghrisida teyyarlan'ghan doklat we telepnamilerni bash konsulgha bergenlikini bildürdi. U yene maykol ependidin amérikining Uyghur xelqige téximu jiddiy halda yardem qolini sunushini ümid qilidighanliqini bildürgen.

Nurmuhemmed türkistani ependining bildürüshiche, bash konsul maykol klayné xitaydin bashqa döletler bilen xitay mesilisi toghrisida sözleshkende Uyghur mesilisinimu otturigha qoyidighanliqini bildürgen we Uyghur mesilisige köngül bölidighanliqigha wede bergen.

Awstiraliye sherqiy türkistan jem'iyitining bash katipi mustapa turan ependi bash konsulgha Uyghur diyarida zulumning chékidin éship ketkenlikini, Uyghur mesilisining xitayning ichki ishliridin halqip ötüp xelq'araliq bir mesilige aylan'ghanliqini we amérika qatarliq gherb dunyasining bu mesilige köngül bölüshi kéreklikini otturigha qoyghanliqini bildürdi.

Adélaydtiki Uyghur mektipining mes'uli zulpiye abdulla xanimmu bu uchrishish toghrisida pikir bayan qilip, uchrishishta Uyghurlargha alaqidar muhim mezmunlar toghrisida muzakire élip barghanliqini bildürdi.