B d t yerlik milletlerning heq - hoquqini qoghdash yighinida Uyghurlar mesilisi anglitildi

Ixtiyariy muxbirimiz ekrem
2015.07.23
dolqun-eysa-bdt-yerlik-milletlerni-qoghdash-yighini-2015.jpg Dolqun eysa ependi b d t yerlik milletlerning heq - hoquqini qoghdash yighinida
RFA/Ekrem


8 - Nöwetlik b d t yerlik milletlerning heq - hoquqini qoghdash yighinigha qatnashqan d u q wekili dolqun eysa ependi Uyghurlar mesilisini otturigha qoyup, xitayning basturush we weyran qilish jinayetlirini pash qilghan.

D u q ijra'iye komitéti re'isi dolqun eysa ependining jenwedin bergen melumatigha asaslan'ghanda, 8 - nöwetlik b d t yerlik milletlerning heq - hoquqini qoghdash mutexessisler yighini b d t ning jenwediki bash shitabida bashlan'ghan bolup, 190 din artuq dölet we 100 din artuq insan heqliri teshkilatlirining wekilliri qatnashqan bu yighinda Uyghurlar mesilisi otturigha qoyulup, küchlük inkas qozghighan.

Yighin b d t kishilik hoquq komitétining aliy komissari we re'isining échilish nutuqliri bilen 20 - iyul küni bashlan'ghan bolup, 24 - iyul axirilishidiken.

Dolqun eysa ependining bildürüshiche, 2007 - yili b d t teripidin otturigha qoyulghan “Yerlik milletlerning heq - hoquqini qoghdash xitabnamisi”gha xitay terep 2008 - yili qol qoyghan bolsimu, özlirining tajawuzchiliq epti - beshirisini dunyadin yoshurush üchün, b d t da yillardin buyan “Xitayda yerlik millet mewjut emes” dégen hile - neyrenglik diplomatiye siyasitini qollinip kelgen.

Mezkur yighinning 22 - iyul küni ötküzülgen “Yerlik milletlerning medeniy heq - hoquqlirining qoghdilishi” namliq 7 - bölümide 5 minutluq söz qilish heqqige érishken dolqun eysa ependi, Uyghurlarning sherqiy türkistanning heqda igisi bolushidek pakitni otturigha qoyup, xitayning süyiqestlirini échip tashlighan. U sözide yene, xitayning Uyghur tiligha qarita yürgüziwatqan basturush siyasetlirini, Uyghur meshreplirini chekleshtek zorawanliqlirini, qeshqer qedimiy shehirini weyran qiliwétishke oxshash medeniyet tajawuzchiliqlirini tilgha élip, yighin ehlining küchlük diqqitini chekken.

Dolqun eysa ependining nutqidin kéyin, bezi dölet we xelq'araliq teshkilatlarning wekilliri uning bilen körüshüp, Uyghurlargha munasiwetlik téximu köp melumatlarni telep qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.