Awstraliyediki Uyghur topchilar: “Biz topni emes, belki zulumni teptuq!”
2018.01.01

Awstraliyediki Uyghurlar 25-dékabirdin 28-dékabirghiche üch kün “Awstraliye sherqi türkistan longqisi” putbol musabiqisi ötküzdi. Musabiqige qatnashqan we chémpiyon bolghan bir topchi “Biz bu meydanda topla tepmiduq, belki bizni erkin nepes alghuzmighan, yelkimizni bésip turghan zulumni teptuq!” dédi.
25-Dékabir küni awstraliyening adéleyd shehiri Uyghur jama'itining chuqan-sürenliri, Uyghurche muzikilarning yangraq sadasi, putbolchi ezimetlerning merdane qiyapiti bilen janlandi. Yilda bir qétim pütün awstraliyediki Uyghurlarni bir yerge jem qilip kéliwatqan “Awstraliye sherqi türkistan longqisi” putbol musabiqisining 11-qétimliqi qizghin alqish sadaliri ichide bashlandi. Bu qétimqi musabiqige sahipxanliq qiliwatqan awstraliye sherqi türkistan jem'iyitining re'isi nurmuhemmet türkistani échilish nutqi sözlidi.
Musabiqe oxshimighan yashtiki guruppilar boyiche ötküzülgen bolup, mahirlarning eng kichiki töt yash, chongliri ellik yashtin ashqanlar iken. Bu yilliq musabiqining eng diqqet qozghighan nuqtisi qiz putbolchilarning musabiqige qatnishishi iken. Ularning top meydanidiki mahariti körürmenlerni alahide jelp qilghan. Musabiqige amérikadin kélip tamashibin bolghan zubeyre shemsidin xanim ziyaritimizni qobul qilip, neq meydandiki tesiratlirini bayan qildi.
Awstraliyening sidnéy shehiridin putbolchi ezimetlerni bashlap musabiqige kelgen awstraliye Uyghur jem'iyitining re'isi memtimin ela bu musabiqining ehmiyitige yuqiri baha berdi. U musabiqe meydanida Uyghurlardin yéngi bir ewlad putbol ezimetlerning, bolupmu qiz putbolchilarning chiqiwatqanliqidin ghurur hés qiliwatqanliqini alahide tekitlidi.
Adéleyd shehiridiki Uyghur tili mektepning oqughuchisi shehiridin bu qétimqi musabiqige ana tilda riyasetchilik qildi. Uning rawan chiqqan Uyghurche tili we chüchük awazi yangrighanda meydanni güldüras alqish sadasi qaplidi.
Musabiqige sahipxanliq qilghan awstraliye sherqi türkistan jem'iyitining bash katipi mustafa turan bu qétimqi pa'aliyetning utuqluq bolushi üchün alahide küch chiqarghan tengritagh xanim-qizlar guruppisigha alahide rehmet éytti. Bu qétimqi üch künlük pa'aliyette yémek-ichmekler heqsiz tarqitilghan bolup adéleyd shehiridiki pidakar acha-singillardin teshkillen'gen mezkur guruppa yétekchilik rol oynighan iken.
“Awstraliye sherqi türkistan longqisi” putbol musabiqisige sidnéy, mélborin, pérs, adéleyd qatarliq töt sheherdin 300 ge yéqin Uyghur mahir we tamashibin qatnashqan. Musabiqide adéleyd birinchi komandisi chémpiyonluqqa érishken.