Türkiyediki 3 uniwérsitétta Uyghurlar toghrisida doklat bérish yighini ötküzüldi

Ixtiyariy muxbirimiz erkin tarim
2018-12-24
Élxet
Pikir
Share
Print
Uyghurlarning éghir weziyitige türkiye hökümitining dawamliq süküt qilip turuwélishigha qarita élip bérilghan pa'aliyet. 2018-Yili dékabir, türkiye.
Uyghurlarning éghir weziyitige türkiye hökümitining dawamliq süküt qilip turuwélishigha qarita élip bérilghan pa'aliyet. 2018-Yili dékabir, türkiye.
RFA/Erkin Tarim

Uyghurlarning éghir weziyiti amérika qoshma shtatliri, kanada we awstraliye qatarliq ghérib elliride dawamliq tilgha éliniwatqan bügünki künde türkiye hökümitining bu mesilige dawamliq süküt qilip turuwélishi türk jama'etchilikining naraziliqini qozghimaqta. Türkiyediki herqaysi uniwérsitétlardiki oqughuchilar uyushmiliri, herqaysi sheherlerdiki ammiwi teshkilatlar arqa-arqidin pa'aliyet uyushturup Uyghurlarning éghir weziyitini otturigha qoymaqta we türkiye hökümitige tesir körsitishke tirishmaqta.

4-Dékabir küni chanaqqel'e 18-mart uniwérsitétida "Insanliq unutqan zémin-sherqiy türkistan" mawzuluq doklat bérish yighini chaqirildi. 19-Dékabir küni bolsa türkiyening sherqiy-shimaligha jaylashqan bayburt shehiridiki bayburt uniwérsitétida "Untulmighan weten-sherqiy türkistan" témisida doklat bérish yighini ötküzüldi.

4-Dékabirdiki mezkur yighin'gha uniwérsitéttiki oqutquchi we oqughuchilardin bolup 500 etrapida kishi qatnashqan bolup, yighinda izmirdiki ege uniwérsitétining oqutquchisi, proféssor, doktor alimjan inayet ependi, 18-mart uniwérsitétining oqutquchisi doktor nur'exmet qurban ependi we mezkur uniwérsitétta oquwatqan Uyghur oqughuchilardin shehide mexmut xanimlar doklat bergen. Proféssor alimjan inayet ependi doklat bérish yighini toghrisida bizge melumat berdi.

19-Dékabir küni bayburt uniwérsitétida ötküzülgen "Untulmighan weten-sherqiy türkistan" témisidiki doklat bérish yighin'gha bayburt shehirining sabiq sheher bashliqi, hazirqi sheher bashliqi, bayburt uniwérsitétining mudiri, oqutquchi we oqughuchiliridin bolup 300 etrapida kishi ishtirak qilghan. Bu yighinda teklip boyiche doklat bergen sherqiy türkistan weqpining sabiq re'isi hamutxan göktürk ependi yighin toghrisida melumat berdi.

Hamutxan göktürk ependi bayburt uniwérsitétidiki bu yighinda istanbul uniwérsitétining oqutquchisi doktor aliy axmetbeyoghlu ependi we nur'ela göktürk xanimningmu doklat bergenlikini bayan qildi.

Bu yighindin kéyinla 20-dékabir küni axshimi türkiyening bolu shehiridiki izzet baysal uniwérsitétida "Sherqiy türkistanning hazirqi weziyiti" témisida doklat bérish yighini ötküzüldi. Uyghur pa'aliyetchi xeyrullah efendigil ependi Uyghur diyarining hazirqi éghir weziyiti toghrisida melumat berdi. Mezkur yighin'gha izzet baysal uniwérsitétining oqutquchi we oqughuchiliri we boliduki bezi ammiwi teshkilat mes'ulliridin bolup köp sanda kishi qatnashti. Xeyrullah efendigil ependi bu heqte melumat berdi.

Ikki aydin buyan her küni dégüdek türkiyening melum bir yéride Uyghurlar toghrisida pa'aliyet ötküzülmekte. Uyghurlar dunyagha shundaqla türk jama'etchilikige öz awazini anglitish üchün istanbuldin enqerege qarap piyade mangmaqta. Proféssor alimjan inayet ependi Uyghurlarning éghir weziyitining xelq'ara axbaratlarda we ijtima'iy taratqularda köplep anglitiliwatqanliqini, buning Uyghur dewasi üchün paydiliq bolidighanliqini bayan qildi.

Bulardin bashqa 16-17-dékabir künliri merhum eysa yüsüp aliptékin wapatining 23-yili munasiwiti bilen istanbul, qeyseri, yozgat qatarliq sheherlerde "Sherqiy türkistan dewasining yol bashchisi eysa yüsüp alptekin we sherqiy türkistanning hazirqi weziyiti" témisida doklat bérish yighini ötküzüldi.

Toluq bet