"Myunxén dunya bixeterliki yighini" toghrisida melumat

Ixtiyariy muxbirimiz ekrem
2016-02-15
Élxet
Pikir
Share
Print
"Myunxén dunya bixeterliki yighini" échilghan bawariye méhmanxanisi
"Myunxén dunya bixeterliki yighini" échilghan bawariye méhmanxanisi
Public Domain


12 - Féwral bashlan'ghan "Myunxén dunya bixeterliki yighini" 14 - féwral axirlashti. 30 Döletning yuqiri derijilik emeldarliri pikir bayan qildi.

Gérmaniye axbarat wastilirining bu toghrisidiki xewerliride bayan qilinishiche, 3 kün dawamlashqan 52. Nöwetlik "Myunxén dunya bixeterliki yighini" myunxén shehiridiki bawariye binasida ötküzüldi. Yighin'gha 30 dölettin kelgen dölet bashliqliri, bash ministirlardin sirt, 70 neper tashqi ishlar, ichki ishlar, dölet mudapi'e ministirliri we 5 neper dölet bixeterlik organlirining mes'ulliri qatnashti.

Yighin ishtirakchiliri arisida gérmaniye tashqi ishlar ministiri shitayin mayer, dölet mudapi'e ministiri ursula xanim, amérika tashqi ishlar ministiri jon kerriy, fransiye bash ministiri manu'il wallés, rusiye bash ministiri dimitrié médwédéw, natoning bash sékritari jéns shitolténbérg qatarliq köpligen meshhur siyasiy shexslermu bar. Yighin dawamida meydanining sirtida 1500 kishilik namayishchi süriye bombardimanigha qarshi naraziliq namayishi ötküzgen.

Yighinda otturigha qoyulghan mesililerning mezmun da'irisi keng bolghan. Mesilen؛ ottura sherqtiki toqunushlar, islam döliti, shimaliy koriye mesilisi, köchmenler mesilisi, ukra'ina mesilisi, yawrupaning bixeterliki, dunya tinchliqi üchün némilerni qilish qatarliqlar.

Gérmaniye dolqunliri radi'osining bu heqtiki xewiride bayan qilinishiche, yighin'gha yene 600 din artuq dangliq siyasetchiler, 48 dölettin kelgen 700 din artuq muxbir qatnashqan. Bawariye hökümiti yighin üchün 340 aliy derijilik yataq, 40 dane yighin zali ajratqan. Texminen 4000 etrapida saqchi yighinning bixeterlikini qoghdashqa mesul bolghan. 1800 Neper mulazim yighin axirlashqiche xizmette bolghan. 140 Dane aptomobil mulazimet qilghan. Xewerde tilgha élinishiche, bu üch künlük yighinda 3 ming dane nan, 4 ming kishilik tamaq, 5500 botulka su, 5 ming botulka herxil ichimlik, 700 botulka üzüm hariqi, 200 botulka piwa istimal qilin'ghan.

Undaqta, bu yighindin hasil qilin'ghan netijiler néme?

Bu toghrisida téxi éniq yekün yoq. Metbu'atlar qandaqtur kélishim yaki ijabiy qararlar toghriliq toxtalmidi. D u q ijra'iye komitéti re'isi dolqun eysa ependi bu yighin heqqide qarashlirini bildürüp ötti. Yawrupa sherqiy türkistan birliki teshkilati re'isi eniwerjan ependimu, bu yighining dunyada ichkiy urushlar ewj alghan bir zamanda échilghan muhim bir yighin bolghanliqini ilgiri sürdi.

Biraq, "Myunxén dunya bixeterliki yighini" din jelp qilarliq bir netije chiqmighan bolsimu, diqqetke sazawer pikirler otturigha qoyulghan. Herqaysi döletning rehberliri özining tesirlik nutuqliri arqiliq, öz döletlirining meydanlirini ipadiligen.

Gérmaniye dolqunliri radiyosi 13 - féwraldiki xewiride, herqaysi el siyasiy erbaplirining nutuqlirining muhim mezmunlirini qisqiche sherhiyilep ötti.

"Myunxén dunya bixeterliki yighini"ning re'isi wolfgang ishéngér mundaq dégen: "Milletchilikning bash kötürüshi ishlirimizni yaxshilash tügül, barghanséri nacharlashturidu. Biz yawrupa birlikining dawamliq put dessep mewjut bolup turushigha muhtaj."

Gérmaniye tashqi ishlar ministiri frank waltér shitayinmayer yawrupa birliki duch kéliwatqan xewpni tilgha élip mundaq dégen: "Ghayet zor bir krizis yawrupani kézip yürmekte, biz choqum yawrupa üchün küresh qilishimiz kérek. Nöwette yawrupadiki yatlishish küchi bu derijide zorayghan iken, kiler yili yene bügünkidek bir yawrupani köreyleydighanliqimizgha kapaletlik qilalaydighanliqimiz toghriliq éniq bir signalimizni bérelishimiz lazim. Mushuni qilalisaq, chong ish qilghan bolimiz."

Gérmaniye dölet mudapiye ministiri ursula xanim süriye mesilisi heqqide toxtalghanda mundaq dégen: "Helebtiki puqralar chala qoyulmay, bombardimanning éghir ziyankeshlikige uchrawatqan bir chaghda, b d t ning bu mesilini hel qilishta ishench yaritishqa urunushini qobul qilish asan emes."

Amérika tashqi ishlar ministiri jon kerriy mundaq dégen: "Bizning birqanche kün, birqanche hepte we birqanche aydin kéyin alidighan qararimiz, süriye urushigha xatime birelishi mumkin. Belkim yene kélichekte téximu müshkül bolghan bashqa qéyinchiliqlargha taqabil turush yolini tallashqa mejbur qélishimizmu mumkin."

Iraq bash ministiri abadi islam döliti mesilisini tilgha alghanda mundaq dégen: "Biz bu yilning, islam dölitining iraqtiki axirqi bir yili bolup qélishini pilanlawatimiz."

Se'udi erebistanning tashqi ishlar ministiri jubayér mundaq dégen: "Eger esed textidin ayrilsa, islam döliti süriyidiki hayatiy küch bexish étiwatqan tupraqliridin mehrum bolidu. Bizning uninggha taqabil turushimiz asan'gha toxtaydu."

Fransiye bash ministiri manu'il walls radikal islamchilarning yawrupagha hujum qilish mesilisi heqqide toxtalghanda mundaq dégen: "Biz yene hujumgha uchraymiz, zor kölemlik hujumgha, bunisi muqerrer. Bu xil derijidin tashqiri térrorchilarning bu tupraqlargha kélishidiki meqsiـi, bu yerlerge yerlishish."

Gérmaniyening sabiq bash minist'iri shimid rusiyege bolghan imbargo mesilisi heqqide toxtalghanda mundaq dégen: "Imbargo her ikki terepke ziyanliq bolghan waste. Jazalash toqunushlarni hel qilish chariliri üchün zor tosalghu. Ukra'ina krizisi tüpeyli yolgha qoyulghan imbargo mesilisi bilen rusiyening süriye siyasitini arilashturiwalmasliq lazim."

Rusiye bash minist'iri médwédéw mundaq dégen: "Biz alliqachan yéngi bir soghuq urush dewrige kirip bolduq. Imbargo héchqandaq bir nersini özgertelmidi. Nahayiti éniqki, imbargo bizning uzun muddetlik iqtisadiy menpetlirimiz üchün paydisiz. Yawrupa birliki bilen rusiyening munasiwéti ziyan'gha uchridi. Ukra'ina xalighanche qirghin qilishtek ichkiy urushta. Ejiba biz tirkishishke emes, hemkarliqqa muhtajliqimizni yene bir qétim 3 - dunya urushini bashtin kechürgendin kéyin chüshinishke éhtiyajliqmu?"

Ukra'ina prézidénti pétro poroshénko mundaq dégen: "Rusiye eskerliri, rusiye qoralliri, rusiye oq - doriliri her künila chégridin ötüp méning dölitimge kiriwatidu. Bu ukra'inaning ichkiy urushi emes, belki rusiye prézidénti putinning zorawanliqi. Rusiyening ottura sherqtiki qilmishliri uning bashqa bir pilanétta yashawatqanliqini körsitip béridu. Süriyedimu ichkiy urush yoq. Bar bolghini putinning ayropilanlirining xelqni bombardiman qilishi."

Xitay tashqi ishlar ministiri wang yi koriye mesiliside mundaq dégen: "Hazir qattiq bir qarar qobul qilidighan waqit keldi. Biz b d t bixeterlik kéngishining yenimu bir qedem ilgirilep heriket qollinip, yéngi bir qarar arqiliq koriyeni qilmishlirigha tégishlik bedel töletküzüshini qollaymiz."

I'ordaniye padishahi abdullah mundaq dégen: "Biz kéler nöwet yene bir qétim körüshken chéghimizda, biz eslidinla saqlinalaydighan krizislar toghriliq sözleshmeydighan bolayli."

Toluq bet