Д у қ рәисиниң норвегийә зиярити иҗабий баһаларға еришти

23-Сентәбир күни норвегийә зияритини башлиған д у қ ниң рәиси долқун әйса әпәндиниң норвегийә һөкүмәт даирилири, кишилик һоқуқ тәшкилатлири һәмдә уйғур җамаити билән учришиш паалийәтлири мол мәзмунлуқ вә нәтиҗилик болған.

Дуня уйғур қурултийи иҗраийә комитетиниң норвегийәдә турушлуқ муавин рәиси сәмәт абла әпәнди бу һәқтә тохталғанда долқун әйса әпәндиниң норвегийәдики уйғурлар мәркәзлишип олтурақлашқан 3 чоң шәһәрдә наһайити әһмийәтлик болған көплигән паалийәтләргә қатнашқанлиқини тилға алди. 

Норвегийәдики уйғур зиялийси абдурешит әпәндиму д у қ рәисиниң норвегийәгә кәлгәндин буян тиним тапмай түрлүк саһәләрдики йиғилиш вә учришишларға қатнишип, норвегийәдики уйғур җамаити арисида иҗабий тәсир қалдурғанлиқини тәкитлиди.

Норвегийәдики уйғур паалийәтчиләрдин пәрһат әпәнди д у қ рәисиниң норвегийә һөкүмәт даирилири вә кишилик һоқуқ тәшкилатлириға уйғурларниң нөвәттики паҗиәлик қисмәтлирини әтраплиқ аңлатқанлиқини билдүрди. У долқун әйсаниң норвегийәдики зиярити җәрянида 11-айда б д т өткүзүлидиған хитайниң кишилик һоқуқ вәзийитини көздин көчүрүш йиғини мунасивити билән 6-ноябир җәнвәдә өткүзүлидиған намайишқа норвегийәдики уйғурларни кәң түрдә сәпәрвәр қилғанлиқини һәмдә д у қ тәрипидин оттуриға қоюлған “уйғурлуқ бәдили” ниң тәшвиқатини нәтиҗилик елип барғанлиқини әскәртти. 

Норвегийәдики уйғурлар бүгүн, йәни 28-сентәбир күни норвегийәниң ситавангер шәһиридә йәнә бир мәйдан паалийәт уюштурған. Норвегийә уйғур комитетиниң рәиси бәхтияр әпәндиниң бәргән мәлуматиға асасланғанда, бу паалийәткә ситавангер шәһәрлик көчмәнләр идариси, рогилан шәһиридики бир қисим партийәләрниң сиясий әрбаблири, хәлқаралиқ кишилик һоқуқ тәшкилатлириниң ситавангерда турушлуқ вәкиллири, ситавангердики мусулман җамаәтлириниң имамлири, черкавларниң поплири, ахбарат органлириниң мухбирлири, д у қ рәһбәрлири, германийәлик мутәхәссис адрян зенс, норвегийә уйғур комитетиниң рәһбәрлири һәмдә 150 әтрапида уйғур җамаити қатнашқан. Паалийәттә уйғур дияриниң нөвәттики вәзийити вә җаза лагерлири мәсилиси асаслиқ сөз темиси болған.

Германийәдин берип д у қ рәисиниң зияритигә һәмраһ болуватқан җамаәт әрбаблиридин аблимит турсун әпәнди сөзидә д у қ вә норвегийә уйғур комитети рәһбәрлириниң бүгүн ситавангер шәһәрлик көчмәнләр идариси хадимлири билән уйғурлар мәсилиси бойичә сөһбәтләр елип барғанлиқини баян қилди. 

Д у қ рәиси долқун әйса әпәнди бир һәптидин буян норвегийә елип бериватқан паалийәтлири тоғрисида тохталғанда уйғур җамаитиниң қизғин күтүвелишиға еришкәнликини һәмдә көплигән мәнилик паалийәтләргә дахил болғанлиқини тилға елип, норвегийәдики уйғурларға болған миннәтдарлиқини билдүрди.